Վենետիկի կինոփառատոնում ցուցադրել են Ցեղասպանության մասին թուրք ռեժիսորի «Սպի»-ն

PanARMENIAN.Net - Հայոց ցեղասպանության մասին թուրքական ծագումով գերմանացի ռեժիսոր Ֆաթիհ Աքինի նոր ֆիլմը՝ «Սպի»-ն (The Cut), օգոստոսի 31-ին ցուցադրվել է Վենետիկի 71-րդ կինոփառատոնի հիմնական մրցույթի շրջանակում, գրում է Interfax-ը:

Ֆիլմերի հնագույն Վենետիկի միջազգային կինոփառատոնը 1935-ից ամենամյա է, հիմնադիրը La Biennale di Venezia (Վենետիկի երկամյա) կազմակերպությունն է: Առաջին անգամ այն անցկացվել է 1932-ի օգոստոսի 6-21-ը որպես Կինեմատոգրաֆիական արվեստի միջազգային ցուցահանդես: Գլխավոր մրցանակը Ոսկե առյուծն է, բայց բացի դրանից նաև շնորհվում են Արծաթե առյուծ, Վոլպի գավաթ (թարգմանվում է «Աղվեսի գավաթ») և ժյուրիի այլ մրցանակներ։

Ավելի վաղ թուրք ազգայնականները ֆիլմի համար սպառնացել էին Աքինին՝ նշելով, որ թույլ չեն տա ֆիլմը ցուցադրել Թուրքիայում այն բանից հետո, երբ ռեժիսորը հարցազրույց է տվել հայկական «Ակօս»-ին։

«Մենք բացեիբաց սպառնում ենք «Ակօս»-ին, հայ ֆաշիստներին ու այսպես կոչված մտավորականներին։ Թուրք-թուրանական ասոցիացիայի աջակցությամբ հրատարակվող Ötüken անվամբ ամսագրի տարածած հայտարարությունում ասվում էր, որ այդ ֆիլմը Թուրքիայի ոչ մի կինոթատրոնում չի ցուցադրվի։

Աքինի նոր ֆիլմում ֆրանսիացի դերասան Թահար Ռահիմը մարմնավորում է թուրքական Մարդինում ապրող հայ տղամարդու, ով մազապուրծ լինելով 1915-ի Հայոց ցեղասպանությունից, իր երկու դստրերին փնտրելու համար ուղևորվում է ԱՄՆ։

Թուրք ազգայնականները կարծում են, որ այս ֆիլմն առաջին քայլն է «Թուրքիային ստիպելու ճանաչել Հայոց ցեղասպանությունը»:

Անգլալեզու ֆիլմի տևողությունը 138 րոպե է, համաշխարհային պրեմիերան նախատեսված է 2014-ի հոկտեմբերի 16-ին։ Սցենարի հեղինակներն են Աքինն ու Մարդիկ Մարտինը, պրոդյուսերներից են նաև Ռուբեն Դիշդիշյանն ու Արամ Մովսեսյանը: Դերերում են Արսինե Խանջյանը, Սիմոն Աբգարյանը, Ակին Գազին և այլոք:

Ավելի վաղ «Ակօս»-ին տված հարցազրույցում 40-ամյա ռեժիսորը նշել էր, որ պատրաստվում էր Դինքի կյանքի մասին ֆիլմ նկարահանել, բայց չկարողացավ թուրք դերասան գտնել, որը կցանկանար մարմնավորել լրագրողին:

«Պլանավորում էի Հրանտ Դինքի մասին ֆիլմ նկարահանել «Հոգեբանական խոհանոցից» (Soul Kitchen, 2009) հետո։ «Ակոսում» հրապարակված Դինքի 12 հոդվածի հիման վրա սցենար էի գրել։ Չգիտեմ՝ արդյոք լավ ֆիլմ կստացվեր, թե՝ ոչ, բայց չկարողացա Դինքի թուրք դերակատար գտնել։ Նրանք բոլորն իրադրությունը ներկայացնելու համար այն չափազանց ծանր էին գնահատում»,- ասել էր նա։

Ֆաթիհ Աքինը ծագումով թուրք գերմանացի ռեժիսոր, դերասան, պրոդյուսեր և սցենարիստ է: Որպես ռեժիսոր առաջին անգամ ներկայացել է 1998-ին «Արագ և առանց ցավի» ֆիլմով, որի համար ստացել է Լոկարնոյի կինոփառատոնի «Բրոնզե ընձառյուծ»-ը և որպես լավագույն երիտասարդ ռեժիսոր Մյունխենի Pierrot փառատոնում: Հետո հաջորդել են «Հուլիսին» ֆիլմը և «Սոլինոն» Մորից Բլայբթրոյի դերակատարությամբ: Աքինի չորրոդ՝ «Գլխով պատին» ֆիլմը մի քանի պարգև է ստացել, այդ թվում՝ Բեռլինի կինոփառատոնի «Ոսկե արջ»-ը: 2005-ին եղել է Կաննի կինոփառատոնի ժյուրիի կազմում, 2007-ին մասնակցել փառատոնին «Դրախտի ծայրին» ֆիլմով (Auf der anderen Seite): 2009-ին ներկայացրել է իր նոր կինոկատակերգությունը՝ «Հոգեբանական խոհանոց» ֆիլմը:

Եղեռնի մասին առաջին ֆիլմը` «Հոգիների աճուրդը», նկարահանվել է 1919-ին Հոլիվուդում: Թեմային է անդրադարձել նաև կանադահայ կինոռեժիսոր Ատոմ Էգոյանը՝ 2002-ին նկարահանելով իր «Արարատը»: Թեմային անդրադարձ կան նաև Էլիա Քազանի «Ամերիկա, Ամերիկա» ու Անրի Վերնոյի «Մայրիկ» ֆիլմերում: 2007-ին Բեռլինի կինոփառատոնում Տավիանի եղբայրները ներկայացրեցին թեմային անդրադարձող ևս մեկ ֆիլմ` «Արտույտների ագարակը»: