Թուրքիան՝ 2015-ի շեմին. Կեղծելով պատմությունը 5 նոյեմբերի 2014 - 15:22 AMT PanARMENIAN.Net - Թուրքիայի նախագահ Ռեջեփ Թայիփ Էրդողանը հոկտեմբերի վերջին աշխատանքային այցով Փարիզում էր, իսկ այցի օրակարգի կիզակետում՝ Հայոց ցեղասպանության 100-ամյա տարելիցը: Թուրքական մամուլի հաղորդմամբ՝ նախագահը պաշտոնական Փարիզին ցանկություն է հայտնել, որ վերջինս չեզոքություն դրսևորի: Դեռ ավելին. Ֆրանսիայի միջազգային հարաբերությունների ինստիտուտում իր ելույթի ժամանակ Էրդողանը, անդրադառնալով հայ-թուրքական հարաբերություններին, ասել է, թե իբրև Հայաստանի հետ մեկ այլ ֆորմատում հարաբերությունները զարգացնելու ուղղությամբ քայլ անողը, ձեռք մեկնողը իրենք են եղել: «2015 թվականին, այսինքն՝ 1915 թվականի դեպքերի հարյուրամյակին, մենք աշխարհին իրականությունը ներկայացնելու համար կշարունակենք ակտիվ ջանքեր գործադրել: Անկասկած այս հարցում ոչ թե հորինված, գաղափարախոսությանը գերի դարձած կամ էլ քաղաքական շահարկման առարկա դարձած պատմությունը, այլ իրական պատմությունն է հաղթելու: Հավատում ենք, որ այս հարցում Ֆրանսիան էլ կլինի ողջամիտ և իրական ճշմարտությանը կսատարի»,- նշել է Թուրքիայի նախագահը: Ֆրանսիայում «իրական պատմության» մասին խոսող Էրդողանն անկասկած տեղյակ է նույն երկրի խորհրդարանում շրջանառվող Ցեղասպանության ժխտումը քրեականացնող օրինագծի մասին. դեռ կտեսնենք՝ վերջինիս ընդունումից հետո էլ է նույն եռանդով ժխտելու իրական պատմությունը, թե ոչ: Այս ելույթով Էրդողանը կարծես վերջ դրեց ապրիլին սկսված խաղին, որտեղ փորձում էր հաշտեցման եզրեր գտնել ու Ցեղասպանության մեղքի մի մասն էլ բարդել հայերի վրա՝ խոսելով ընդհանուր ցավից, հաշտեցումից: Այս ելույթով պարզ դարձավ, որ Էրդողանը երբեք էլ ի սրտե ներողություն խնդրելու ու 1915-ին տեղի ունեցած Ցեղասպանության փաստն ընդունելու մտադրություն չի ունեցել: Դա խաղ էր, խայծ, որ հայերը կուլ չտվեցին: Իսկ եթե չստացվեց, պետք է վերադառնալ նախկին դիրքորոշմանն ու դեռ մի 100 տարի էլ ժխտել պատմությունը: Ինչևէ, նախագահի ելույթը կարծես յուրատեսակ ազդանշան լիներ թուրքական լրատվականներին ու Ցեղասպանությունը մոլի ժխտողներին: Արդեն 5 օր է թուրքական մամուլը հեղեղված է հակահայ ու ժխտողական նյութերով: Թուրքիայի մայր ընդդիմությունը` «Ժողովրդահանրապետական կուսակցություն»-ը, օրինակ, հայտարարեց, որ 2015-ի ապրիլին Ստամբուլում ծրագրել է անցկացնել 1915-ին նվիրված համաժողով, որին հրավիրված են լինելու հայտնի պատմաբաններ աշխարհի տարբեր երկրներից: Նախատեսվում է 5 ամսում 3 միջազգային կոնֆերանս անցկացնել: Բացի պատմաբաններից մասնակցելու են նաև մի շարք ականավոր քաղաքական ու պետական գործիչների թոռներ, ինչպես օրինակ` Չերչիլի թոռ Սիլյա Սենդիեսը, Էնվեր փաշայի թոռ Օսման Մայաթեփեքը, Քյազիմ Կարաբեքիրի թոռ Ֆիլիզ Հանըմը և այլք: Նրանք նաև կոչ են արել հայերին գալ և մասնակցել ապրիլյան համաժողովին, լսել, թե «ինչ են պատմաբանները խոսում 1915-ի վերաբերյալ»: Ի դեպ, հրավիրվածների թվում է նաև ՀՀ նախագահ Սերժ Սարգսյանը: Հետաքրքիր է, մի՞թե Թուրքիայում իրոք կարծում են, թե կարող են մեզ ինչ-որ նոր բան պատմել իրենց գործած Եղեռնի մասին: Հավանաբար կարող են. հատկապես Ցեղասպանության այն դրվագների մասին, որոնց ականատես ոչ մի հայ կենդանի չի մնացել: Բացի այդ, չմոռանանք, որ թուրքական արխիվները վաղուց«սրբագրել» են: Օրերս մեկ այլ ուշագրավ ելույթի էլ ականատես եղանք. Թուրքիայի ռադիոյի և հեռուստատեսության ընկերության կազմակերպած համաժողովին հյուրընկալված փոխվարչապետ Յալչըն Աքդողանը պատասխանել է արտասահմանցի լրագրողների հարցերին՝ անդրադառնալով նաև հայկական թեմային: Լրագրողներից մեկի հարցին, թե որոնք են Թուրքիայի անելիքները Հայոց ցեղասպանության 100 ամյակին ընդառաջ, Աքդողանն անկասկած պնդել է, թե հայկական հարցի վերաբերյալ լուրջ «ապատեղեկատվություն» է տարածվում: Թուրք պաշտոնյայի խոսքով Թուրքիան այդ թեմայով ավելի լուրջ լոբբիստական աշխատանք պետք է տանի ու «հասարակական դիվանագիտություն» բանեցնի: Հատկանշական է, որ նա անդրադարձել է նաև հայկական սփյուռքին՝ ասելով իբր Թուրքիան ջանքեր է գործադրել հայերի հետ հարաբերությունները կարգավորելու համար՝ նպատակ ունենալով օգնել «նեղության մեջ հայտնված հայերին»: «Սակայն սփյուռքին այնքան էլ չի հետաքրքրում այն հանգամանքը, որ Հայաստանում մարդիկ վատ են ապրում ու Հայաստանի տնտեսությունը անկման է գնում»,- ասել է նա՝ հայերի հետ հարաբերությունների կարգավորման գլխավոր խոչնդոտը համարելով հենց սփյուռքը: Այստեղ թույլ տվեք հարցնել թուրք պաշտոնյային. իսկ ինչի՞ արդյունքում է ձևավորվել հայկական բազմամիլիոն Սփյուռքը. հիշեցնեմ՝ նորագույն շրջանում հայկական Սփյուռքն առաջացել է նույն թուրքերի կողմից իրականացված Ցեղասպանության, ջարդի, բռնագաղթի ու հայրենազրկման արդյունքում: Հայ գաղթականները, զրկվելով հայրենիքում ապրելու հնարավորությունից, սփռվեցին աշխարհի տարբեր երկրներում։ Հայ ժողովրդի կողմից կատարվածի ճակատագրական նշանակության գիտակցման արտահայտություններից է գաղթաշխարհի այդ՝ որակապես նոր տեսակի անվանումը «սփյուռք», որը հայերենում մինչ այդ չէր կիրառվել սեփական պատմության, տարբեր երկրներում գոյություն ունեցող հայ համայնքների նկատմամբ։ Էրդողանի փարիզյան այցից 1-2 օր անց ևս մեկ հակահայ հոդված հայտնվեց թուրքական մամուլում. հայկական հարցին էր անդրադարձել հայտնի լրագրող և BengüTürk հեռուստաընկերության տնօրեն Մուրադ Իդեն. «2015-ի շեմին ենք:Հայաստանն ու հայկական լոբբին, հայկական սփյուռքն ու կազմակերպությունները պարապ չեն մնում: 1915-ի դեպքերի տարելիցին գուցե և ամբողջ աշխարհը ոտքի կանգնի… Իսկ մենք ի՞նչ ենք անում կամ ի՞նչ ենք անելու»,- գրում է նա՝ հավելելով, թե բավական չէ այն հանգամանքը, որ Թուրքիան այնպիսի իշխանություն ունի, որը դեմ չէ Հայաստանի հետ սահմանները բացելուն, անգամ կան լրագրողներ, որոնք այցելում են Լեռնային Ղարաբաղ: Դե իհարկե, 2015-ը պետք է կարողանալ օգտագործել, ու պաշտպանել «խեղճ, հալածված եղբայր Ադրբեջանին»: Բայց դե, ինչպես Էրդողանն է ասում՝ իրական պատմությունն է հաղթելու: Չեմ վիճում: Հ.Գ. Երկու օր է համացանցը հեղեղված է Շառլ Ազնավուրի աղմկահարույց հարցազրույցով թուրքական ինչ-որ թերթի. նշվում է, թե Ազնավուրը թուրքական մրցանակաբաշխության դափնեկիր է դարձել, ու դրանից իբրև թե այնքան է ոգևորվել, որ հայտարարել է, թե պաշտում է թուրքերին ու ոչ մի վատ բան չի տեսնում Ցեղասպանության ժխտման մեջ: Բնականաբար, սա թուրքկան հերթական սուտն էր: Էլ չգիտեն ինչ անեն, որոշել են հետևել «եղբայր Ադրբեջանի» օրինակին ու հայտնի մարդկանց «շուրթերով» կեղծել պատմությունը: Հ.Գ.2. ՀՀ արտգործնախարարությունն արդեն հերքել է լուրը. Շառլ Ազնավուրը որևիցե թուրքական թերթի հարցազրույց չի տվել և մրցանակ չի ընդունել։ Քրիստինե Քյուրքլյան / PanARMENIAN.Net Ուշագրավ Նա հավելել է, որ որևէ երկիր չի կարող վիճարկել որևէ այլ երկրի մարտունակ բանակ ունենալու իրավունքը Նա նաև ասել է, որ Հայաստանի և Վրաստանի միջև սահմանազատման աշխատանքները վերսկսելու պայմանավորվածություն կա
Նրա գնահատմամբ՝ մտահոգիչ է նաև հատվածական սահմազատում և սահմանագծում իրականացնելը Դեսպանը նաև հրապարակել է Politico-ի հոդվածը «Thales» ընկերության ֆրանսիական ռադարների մասին Ամենաընթերցվողը բաժնում | ԱԳՆ․ Ստացել ենք խաղաղության պայմանագրի նախագծի վերաբերյալ Ադրբեջանի առաջարկները Սա տեքստի 9-րդ խմբագրությունն է Թունյան․ Ադրբեջանից գազ գնելու հարց այս պահին չկա օրակարգում Ըստ նրա՝ Հայաստանի կամ որևէ այլ երկրի համար տարբերություն չկա, թե որտեղից կգնի իր էներգառեսուրսը ՀՀ–ն կգործակցի Իտալիայի հետ ռազմական, ռազմատեխնիկական ոլորտներում․ Կան պայմանավորվածություններ Այցը տեղի է ունեցել ապրիլի 23-25-ը Բողոքի ակցիա՝ Բեռլինում «Ալիևին՝ Հաագա» վանկարկումով Ակցիայի մասնակիցները նաև ծածանել են Արցախի Հանրապետության դրոշը |