Նավթի գներն աճել են՝ արձագանքելով Սաուդյան Արաբիայի հայտարարությանը

PanARMENIAN.Net - Brent տեսակի նավթի փետրվարյան ֆյուչերսների արժեքն աճել է՝ հասնելով 62,52 դոլարի մեկ բարելի դիմաց: WTI տեսակի թեթև նավթի հունվարյան ֆյուչերսներն աճել են՝ հասնելով 58,03 դոլարի մեկ բարելի դիմաց:

Ինչպես հայտնում է ՌԻԱ Նովոստի գործակալությունը, նավթի գների կայունացումը շուկայի արձագանքն է Սաուդյան Արաբիայի հայտարարությանն այն մասին, որ շուկան կարող է ինքնուրույն կայունանալ: Սաուդյան Արաբիայի էներգետիկայի նախարար Ալի Ալ Նաիմին նախօրեին հայտարարել է, որ նավթի գլոբալ ավելցուկը կապված է ՕՊԵԿ-ից դուրս «սև ոսկու» արդյունահանողների միջև գործակցության բացակայության հետ: Ընդ որում, ըստ նրա, համաշխարհային տնտեսական աճը նպաստում է նավթի պահանջարկի աճին:

Նոյեմբերի 27-ին Վիեննայում տեղի ունեցավ ՕՊԵԿ հերթական գագաթնաժողովը, որի ժամանակ քննարկվեց նաև նավթի արդյունահանման քվոտաների նվազեցման հարցը: Գործող քվոտան օրական մոտ 30 մլն բարել է: Կազմակերպության որոշ անդամներ՝ Վենեսուելան կամ Իրանը, ինչպես նաև դիտորդի կարգավիճակ ունեցող Ռուսաստանը, փորձեցին պնդել, որ արդյունահանումը նվազեցվի՝ գների աճին նպաստելու համար: Արաբական երկրներն ավելի վաղ հայտարարել էին, թե մտադիր չեն նվազեցնել արդյունահանումը՝ Սաուդյան Արաբիան հայտարարել էր, որ պատրաստ է մեկ բարելի դիմաց 80 դոլար գնին երկու տարվա ընթացքում: Իսկ Քուվեյթը հայտարարել էր, որ պատրաստ է հանդուրժել նույնիսկ 76-77 դոլարը մեկ բարելի դիմաց:

Եվրոպան, հակառակը, գնանկումից շահում է: Եթե ցածր գները պահպանվեն, ԵՄ-ն մինչև 25 մլրդ դոլար կտնտեսի արդեն այս տարի, ներկրումը տարեսկզբից կազմել է 475 դոլար: Եթե նավթի գինը մեկ բարելի դիմաց շարունակի 80 դոլարի շեմից ցածր մնալ նաև 2015-ին, նավթի ներկրումը ԵՄ կնվազի մինչև 425 մլրդ դոլար տարեկան կտրվածքով: Դա 80 մլրդ քիչ է եվրոպական նավթային ներկրումից 2013-ին: