Հայազգի մարզուհին Բաքվում ոսկե մեդալ է նվաճել

PanARMENIAN.Net - Գյումրեցի Սեդա Թութխալյանը Ռուսաստանի սպորտային մարմնամարզության կանանց հավաքականի կազմում դարձել է Բաքվում ընթացող Եվրոպական մարզական առաջին խաղերի թիմային չեմպիոն:

Ռուսաստանի թիմը հավաքել է 116,897 միավոր՝ առաջ անցնելով Գերմանիայի (110,397) և Հոլանդիայի (110,099) թիմերից: Հավաքականի կազմում Թութխալյանի հետ հանդես են եկել Վիկտորիա Կոմովան և Ալիյա Մուստաֆինան, գրում է Ria.ru-ն:

Հայազգի մարզուհին նաև որակավորվել է անհատական առաջնության եզրափակիչ փուլ և կշարունակի մասնակցությունն առաջնությունում։

15-ամյա Թութխալյանը 2015-ի պատանեկան օլիմպիական չեմպիոն է: Սամբոյի աշխարհի և ԽՍՀՄ-ի եռակի չեմպիոն Գուրգեն Թութխալյանի դուստրը սկսել է մարզվել 7 տարեկանից Մոսկվայում:

Եվրոպական խաղերում Հայաստանն ունի մեկ արծաթե մեդալ, որը նվաճել է Միհրան Հարությունյանը հունահռոմեական ոճի ըմբշամարտի մրցաշարի 66 կգ քաշային կարգում: Հրաձիգ Հրաչիկ Բաբայանը 10 մետր օդամուղ հրացանով վարժության որակավորման փուլում սահմանել է երիտասարդների Եվրոպայի ռեկորդ (629,3 միավոր), սակայն մրցաշարում գրավել 5-րդ տեղը:

Ադրբեջանի մայրաքաղաք մեկնած Հայաստանի հավաքականի կազմում 25 մարզիկ է, որոնք մրցում են տեկվանդո, հրաձգություն, սամբո, ձյուդո, բռնցքամարտ, ազատ ոճի և հունահռոմեական ըմբշամարտի մեդալների համար։