Արցախի «Տնջրե» 4-րդ միջազգային փառատոնին կմասնակցեն երաժիշտներ աշխարհի 11 երկրից

27 հունիսի 2015 - 13:33 AMT

PanARMENIAN.Net - Դասական երաժշտության «Տնջրե» միջազգային փառատոնը 4-րդ անգամ կկազմակերպվի Արցախում հունիսի 28-ից հուլիսի 5-ը: Փառատոնին կմասնակցեն պատանի կատարողներ աշխարհի 11 երկրից` Իտալիայից, Սլովենիայից, Բոսնիայից, Ֆինլանդիայից, Շվեդիայից, Լեհաստանից, Լիտվայից, Սինգապուրից, Նիդեռլանդներից, Հայաստանից ու Արցախից, հաղորդում է ԼՂՀ մշակույթի և երիտասարդության հարցերի նախարարությունը:

Փառատոնի շրջանակում մասնակիցները հանդես կգան անհատ կատարումներով, անսամբլներում և նվագախմբի հետ: Փառատոնային համերգները կանցնեն Ստեփանակերտ, Շուշի, Մարտակերտ, Բերձոր, Ճարտար քաղաքներում: Փառատոնի օրերին Ֆինլանդիայից ու Նիդեռլանդներից հրավիրված ճանաչված մասնագետների կողմից կտրվեն դաշնամուրի, ջութակի և կլառնետի վարպետության դասեր:

«Տնջրե» փառատոնը, որի կազմակերպիչն է ԼՂՀ մշակույթի և երիտասարդության հարցերի նախարարությունը, առաջին անգամ կազմակերպվել է 2010-ին: Դրա խորհրդանիշն Արցախի Մարտունու շրջանի Սխտորաշեն գյուղում գտնվող պատմական սոսի (ղրբ. բարբառով՝տնջրե) 2000-ամյա ծառն է:

Փառատոնի նպատակն է՝ խթանել Արցախում դասական երաժշտարվեստի զարգացումը, արցախցի երիտասարդ երաժիշտներին հաղորդակից դարձնել համաշխարհային կատարողական արվեստի լավագույն ավանդույթներին, նպաստել տարբեր երկրների երաժիշտների հետ մշակութային կապերի հաստատմանը: