Մովսիսյանն անհատապես է մարզվում, Օզբիլիսը` վերականգնվում վնասվածքից

PanARMENIAN.Net - Մոսկովյան «Սպարտակը» նոյեմբերի 19-ին հերթական մարզումն է անցկացրել` նախապատրաստվելով «Կրասնոդարի» հետ Ռուսաստանի առաջնության 16-րդ տուրի հանդիպմանը:

Ընդհանուր խմբում աշխատել են հավաքականներից վերադարձած բոլոր ֆուտբոլիստները` դարպասապահ Արտյոմ Ռեբրովը, պաշտպան Դմիտրի Կոմբարովը, կիսապաշտպաններ Դենիս Գլուշակովը, Ռոման Շիրոկովը և Քուինսի Պրոմեսը, ինչպես նաև Ռուսաստանի երիտասարդական հավաքականի դարպասապահ Անտոն Միտրյուշկինը, գրում է Panorama.am-ը:

Հարձակվող Յուրա Մովսիսյանը մարզվել է անհատական ծրագրով, պաշտպան Վլադիմիր Գրանատը` որոշակի սահմանափակումներով: Իսկ ահա Արաս Օզբիլիսը, Եվգենի Մակեևը և Ժանո Անանիձեն շարունակում են ապաքինվել վնասվածքներից:

Նոյեմբերի 14-ին հայտնի է դարձել, որ Հայաստանի ֆուտբոլի հավաքականի և մոսկովյան «Սպարտակի» հարձակվող Յուրա Մովսիսյանը կարող է տեղափոխվել ամերիկյան «Ռեալ Սոլթ Լեյք»: Ասվում է, որ «Սպարտակը», հայտարարել է, որ Մովսիսյանը կհեռանա ակումբից ձմեռային տրանսֆերային պատուհանի ընթացքում: Այսպիսով, ամերիկյան ակումբը մտադիր է հրավիրել Մովսիսյանին, որը պաշտպանել է «Ռեալ Սոլթ Լեյք»-ի գույները 2007-2009 թթ.:

«Սպարտակի» հետ Մովսիսյանի գործող պայմանագրի ժամկետը սպառվում է 2017-ի ամռանը: Այս խաղաշրջանում նա 10 խաղի է մասնակցել և դարձել է 3 գոլի հեղինակ:

Ավելի վաղ հայտնի դարձավ, որ «Սպարտակից» կարող է հեռանալ նաև թիմի մեկ այլ հայազգի ֆուտբոլիստ` կիսապաշտպան Արազ Օզբիլիսը, որի ծառայություններով հետաքրքրվում է թուրքական «Բեշիկթաշը»: Ըստ ռուսական ԶԼՄ-ների, «Սպարտակը» մտադիր է հրաժարվել մի քանի խաղացողներից ձմեռային տրանսֆերային շրջանում, այդ թվում Մովսիսյանից և Օզբիլիսից: