Եվրահանձնաժողովը ևս €110 մլն է հատկացրել Թուրքիային միգրացիան սահմանափակելու համար

PanARMENIAN.Net - Եվրահանձնաժողովը ևս €110 մլն է հատկացրել Թուրքիային` սահմանափակելու համար փախստականների հոսքը: Այդ մասին հայտնել է կառույցի մամուլի ծառայությունը: Այդպիսով, ընդհանուր առմամբ 2016-ի սկզբից Եվրահանձնաժողովն Անկարային արդեն €187 մլն է հատկացրել խոստացված €3 մլրդից, հայտնում է ՏԱՍՍ-ը:

«Ապրիլի 19-ին Եվրահանձնաժողովը շարունակել է կատարել իր պարտավորությունները Թուրքիայում Փախստականների աջակցության հիմնադրամին միջոցների հատկացումն արագացնելու ուղղությամբ: Հատկացված €110 մլն €60 միլիոնը կծախսվի Հունաստանից Թուրքիա վերադարձող (ըստ ԵՄ հետ պայմանավորվածության) փախստականների սննդամթերքի, բուժօգնության և տեղավորելու համար: Եվս €50 միլիոն կծախսվի Թուրքիայում 15 նախագծերի իրականացման համար` այդ երկիր ժամանող սիրիացի փախստականների առաջնային կարիքները հոգալու նպատակով»,-տեղեկացրել է ԵՀ-ն:

Ավելի վաղ Թուրքիայի վարչապետ Ահմեդ Դավութօղլուն հայտարարել էր, որ Անկարան չի պահպանի փախստականների մասին ԵՄ հետ պայմանավորվածությունները, եթե Եվրամիությունը չկատարի Թուրքիայի հետ առանց վիզայի ռեժիմ սահմանելու վերաբերյալ խոստումը: Այդ մասին հայտնում է Haqqin.az-ը Reuters- վրա հղումով: Նա նշել է, որ Թուրքիան աշխատում է ԵՄ առջև իր ստանձնած պարտավորությունների կատարման վրա: «ԵՄ-ն նահանջելու հնարավորություն չունի այն բանից հետո, երբ մենք այսքան հեռուն ենք գնացել»,-հայտարարել է Դավութօղլուն:

Ըստ Թուրքիայի և ԵՄ միջև գործարքի պայմանների, Անկարան ընդունելու է փախստականներին, որոնք ապօրինաբար են հասնում Հունաստանի ափերին: Փոխարենը Թուրքիայի քաղաքացիների համար կչեղարկվի մուտքի արտոնագրերի ռեժիմը ԵՄ երկրների հետ, կարագացվեն ԵՄ-ին Թուրքիայի անդամակցության վերաբերյալ բանակցությունները, և ևս 3 մլրդ եվրո կհատկացվի արդեն խոստացված 3 մլրդ եվրոյից բացի:

Ավելի վաղ ԶԼՄ-ները հայտնեցին, որ ԵՄ-ն մտադիր է իրեն իրավունք վերապահել վերադարձնել մուտքի արտոնագրերի ռեժիմը Թուրքիայի, Վրաստանի և Ուկրաինայի համար: Իսկ մինչ այդ Դավութօղլուն հայտարարել էր, որ արդեն ընթացիկ տարվա հունիսին Թուրքիայի քաղաքացիները կկարողանան ԵՄ երկրներ այցելել առանց մուտքի արտոնագրի: