Շոյգու. ՌԴ-ն շահագրգռված է, որ իր դաշնակիցներն արդիական սպառազինություն ունենան

PanARMENIAN.Net - Ռուսաստանը շահագրգռված է, որ իր դաշնակիցներն ու գործընկերները կոմպակտ, բարձր շարժունակության ուժեր ունենան` հագեցած ժամանակակից զենքով: Այդ մասին հայտարարել է ՌԴ պաշտպանության նախարար Սերգեյ Շոյգուն:

«Մենք շահագրգռված ենք, որպեսզի մեր դաշնակիցներն ու գործընկերները կոմպակտ, բարձր շարժունակության զինված ուժեր ունենան` հագեցած արդիական սպառազինությամբ և ռազմական տեխնիկայով, որոնք ունակ կլինեն հուսալիորեն և արդյունավետ կերպով դիմակայել ազգային անվտանգության մարտահրավերներին ու սպառնալիքներին: Մեր գործողությունների տրամաբանությունը պարզ է ու հստակ` ՀԱՊԿ սահմանների ամրացումը Ռուսաստանի անվտանգության հզորացում է»,-հայտարարել է Շոյգուն Միջազգային անվտանգության մոսկովյան խորհրդաժողովի շրջանակում, հայտնում է ՌԻԱ Նովոստին:

Ըստ ՌԴ ՊՆ ղեկավարի, ընդհանուր խնդիրներից մեկն է թույլ չտալ ահաբեկչության տարածում ԱՊՀ երկրների տարածքում: Շոյգուն պարզաբանել է, որ հատուկ ուշադրություն է դարձվում «վտանգավոր իրավիճակին» Կենտրոնական Ասիայում, որի վրա բացասաբար է ազդում ահաբեկչական սպառնալիքն Աֆղանստանի տարածքից:

2015-ին Հայաստանն ու Ռուսաստանը կնքեցին վարկային պայմանագիր, որի համաձայն Մոսկվան պետք է $200 մլն վարկ տրամադրի՝ սպառազինության ձեռքբերման համար: ՀՀԿ պատգամավոր Գագիկ Մինասյանը ապրիլի 11-ին հայտարարել է, որ ռուսական վարկով գնվելիք սպառազինության մատակարարումն ուշացվել է:

Ընթերցեք նաև. ՌԴ-ից գնվող զենքի գործարքով պարտավորությունների իրականացումը կվերահսկվի