Մայր աթոռ. Հռոմի պապի այցի օրերին Աթեշյանը Հայաստան չի ժամանելու

PanARMENIAN.Net - Պոլսո Հայոց պատրիարքի փոխանորդ Արամ արքեպիսկոպոս Աթեշյանն այս օրերին Հայաստան չի ժամանելու: Այդ մասին տեղեկացրել է Մայր Աթոռ Սուրբ Էջմիածնի տեղեկատվական համակարգի տնօրեն Վահրամ քահանա Մելիքյանը:

«Այս օրերին Արամ արքեպիսկոպոս Աթեշյանը Հայաստան չի ժամանելու», -փոխանցել է քահանա Մելիքյանը, գրում է Panorama.am-ը:

Հունիսի 15-ին պատրիարքարանի պաշտոնական կայքը տեղեկացրել է, որ արքեպիսկոպոս Արամ Աթեշյանը Հայաստան կայցելի: Նշվում էր, որ Աթեշյանը հունիսի 15-ին մեկնում է Ռուսաստան, որտեղից էլ կուղևորվի դեպի Հայաստան՝ մասնակցելու Գերագույն հոգևոր խորհրդի նիստերին, ինչպես նաև Հռոմի պապի՝ Հայաստան այցելության միջոցառումներին:

Այցին դեմ է արտահատվել Թուրքիայի հայ համայնքը՝ հայտարարելով, որ Աթեշյանըհակահայ հայտարարություններով Թուրքիայի հայությունը և ընդհանրապես, արևմտահայության արժանապատվությունը վարկաբեկելով թուրքական կառավարության քարոզչական մեքենայի գործիքն է դարձել:

Իսկ Հայաստանում կազմակերպվել էր «Թույլ չենք տալու Արամ Աթեշյանին Հայաստան մտնել» հանրային նախաձեռնությունը՝ որին միացել էր 28 պատգամավոր:

Նախաձեռնող խումբը հունիսի 21-ին տեղեկացրել է, թե քանի որ որևէ պատկան մարմնից հնարավոր չի եղել ճշտել, թե երբ և ինչպես է Աթեշյանը ժամանելու Հայաստան, հետևաբար բողոքի ակցիայի օրը տեղափոխվում է հունիսի 24-ին Էջմիածնում:

Կարդացեք նաև՝ Վահրամ քահանա Մելիքյան. Աթեշյանին կարգալույծ անելու հարց դրված չէ