Թուրքիայի վարչապետ. Եթե ԵՄ-ն չչեղարկի վիզային ռեժիմը, լուրջ խնդիրներ կունենա ներգաղթյալների հետ

PanARMENIAN.Net - Թուրքիայի վարչապետ Բինալի Յըլդիրիմը TRT Haber հեռուստաալիքին տված հարցազրույցում անդրադարձել է Թուրքիայի և Եվրամիության միջև սպասվող վիզային ռեժիմի չեղարկման թեմային, հայտնում է Tert.am-ը:

Վարչապետը, մասնավորապես, նշել է, որ Թուրքիայի դիրքորոշումն այս հարցում անփոփոխ է, և իրենք ակնկալում են, որ ԵՄ-ն Թուրքիայի հետ վիզային ռեժիմը կչեղարկի հոկտեմբերի կեսին: «Հակառակ պարագայում անօրինական ներգաղթյալների խնդիրը լուրջ անհանգստություն կդառնա ԵՄ երկրների համար: ԵՄ-ն պետք է սա գիտակցի որոշում կայացնելուց առաջ»,- ասել է Յըլդիրիմը:

Ավելի վաղ Թուրքիայի արտգործնախարար Մևլութ Չավուշօղլուն հայտարարել էր, որ իրենք հետ չեն ընդունի Թուրքիայի տարածքով Եվրոպա անցած սիրիացի փախստականներին, եթե Թուրքիայի և ԵՄ-ի միջև վիզային ռեժիմը մինչև հոկտեմբերի կես չչեղարկվի: Թուրքիան և ԵՄ-ն ավելի վաղ համաձայնագիր էին կնքել՝ կարգավորելու Էգեյան ծովով Թուրքիայից Հունաստան անցնող ներգաղթյալների ու փախստականների հարցը։ Նույն համաձայնագրով նախատեսվում էր Թուրքիայի քաղաքացիների համար չեղարկել մուտքի արտոնագրերը ԵՄ տարածք, ինչպես նաև լրացուցիչ 3 մլրդ եվրո հատկացնել։