Իտալիայում ձնահյուսից զոհվածների ընդհանուր թիվը 29 է. Փրկվել է 11 մարդ

26 հունվարի 2017 - 13:04 AMT

PanARMENIAN.Net - Իտալիայում փրկարարները ձնահյուսի տակ մնացած Rigopiano հյուրանոցում հայտնաբերել են վերջին 2 զոհի մարմինները: Զոհերի ընդհանուր թիվը 29 է, 11 մարդ հաջողվել է փրկել:

Ինչպես պարզել է դատաբժշկական փորձաքննությունը, մարդկանց մահվան պատճառ են դարձել վնասվածքները, շնչահեղձությունը և ցրտահարությունը:

Ինչ վերաբերում է ցրտահարության դեպքերին, ապա ըստ դատաբժշկական փորձագետներից մեկի, եթե օգնությունն ավելի շուտ հասներ տուժածներին` ձնահյուսից հետո առաջին ժամերին, հավանաբար, նրանց կհաջողվեր փրկել, հայտնում է ANSA գործակալությունը:

Հունվարի 18-ի երեկոյան ձնահյուսը ծածկել է Աբրուցո շրջանում գտնվող 3-հարկանի Rigopiano հյուրանոցը: Ձյան առատ տեղումների և փակ ճանապարհների պատճառով փրկարարները միայն հունվարի 19-ի առավոտյան են հասել դեպքի վայր:

Հղումներ թեմայով.

Meduza: Найдены тела всех 29 погибших при сходе лавины в Италии

AP. Final toll for Italy avalanche stands at 29 as recovery ends