Տիեզերքում հայերի և կազակների մասին սերիալը կսկսվի Թրամփի միջուկային հարվածից

PanARMENIAN.Net - «Կազակների և հայերի մեծ տիեզերական ճամփորդությունը» ապոկալիպտիկ սերիալի ստեղծման գաղափարը ինքնաբուխ է առաջացել, և կապված է այն հանգամանքի հետ, որ Դոնի Ռոստովում հնուց ի վեր բազում հայեր են ապրում: Այդ մասին PanARMENIAN.Net ի հետ զրույցում պատմել է երաժշտական և ինտերնետ նախագծերի հայտնի ռոստովցի պրոդյուսեր Սերգեյ Պիմենովը, որն էլ նկարահանելու է սերիալը:

Ըստ պրոդյուսերի, սերիալը կսկսվի նրանից, որ ԱՄՆ գործող նախագահ Դոնալդ Թրամը «խելագարվում է և հրթիռներ է արձակում Դոնի ուղղությամբ»:

«Ըստ սյուժեի, հետո ատոմային պատերազմ է սկսվում, «ենթատարածքից» հայտնվում են կազակները՝ փրկելու համար իրենց հողը: Կազակ Իվան Կոլոդկինը հողի մեջ է խրում ատաման Պլատովի սուրը և տարածաշրջանը հայտնվում է ուժային դաշտի տակ՝ տարածքն անջատվում է Երկրից և հայտնվում տիեզերքում: «Կազակները գրավում են իշխանությունն այդ տարածքում, իրենց կարգերն են հաստատում, բայց կա հայերի գործոնը՝ Չալտիրն ու Նախիջևանը: Բնականաբար, հայերի հետ պայմանավորվել է պետք, կազակները հանրահավաք են անում նրանց հետ և տալիս են հայերին առևտուրը, մաքսային ծառայությունն ու սահմանը, ինչը նույնպես ակնհայտ է»,-պատմել է պրոդյուսերը:

Ըստ Պիմենովի, իրադարձությունների ֆոնին կծավալվի սիրո պատմությունը՝ «Խաղաղ Դոնը» վեպի մոտիվներով: Իսկ առաջին եթերաշրջանի ավարտին «տիեզերքում հայկական հարսանիք կանեն», բայց մինչ այդ փեսացու Իվանն ու հարսնացու Սիրանույշը դեռ պետք է համոզնե իրենց ընտանիքներին և համաձայնություն ստանան: «Սկզբում կողմերը դեմ են այդ միությանը, բայց հետո ամեն ինչ լավ է ավարտվում, ժողովրդների բարեկամությամբ»,-ասել է Պիմենովը:

Նա հավելել է, որ նկարահանումները կսկսվեն 2017-ի ամռանը: Ակնկալվում է, որ սերիալը 10 սերիա կունենա: