Մնացականյան. ՀՀ-ն և ՌԴ-ն մնում են վստահելի դաշնակիցներ

PanARMENIAN.Net - ՀՀ-ն և Ռուսաստանի Դաշնությունը շարունակում են մնալ վստահելի ռազմավարական դաշնակիցներ։ Այդ մասին ԱԳ նախարար Զոհրաբ Մնացականյանը հայտարարել է Երևանում ընթացող ԱԳՆ կենտրոնական ապարատի և դիվանագիտական ներկայացուցչությունների ղեկավարների ու հյուպատոսական հիմնարկների ամենամյա համաժողովում ունեցած ելույթում:

«Մեզ Ռուսաստանի ժողովրդի հետ միավորում է ընդհանուր պատմությունը, մշակութային և մարդկային սերտ կապերը։ Հայաստանի և Ռուսաստանի հետ համագործակցության դաշնակցային օրակարգը ծավալուն է։ Այն ներառում է ռազմաքաղաքական անվտանգության, էներգետիկ և ենթակառուցվածքների զարգացման, առևտրատնտեսական համագործակցության, կրթական և մշակութային փոխանակումների ծրագրեր և զարգանում է հասարակական կյանքի գրեթե բոլոր ուղղություններում։ Հայաստանը կարևորում է ՀԱՊԿ-ի և ԵԱՏՄ շրջանակներում ընթացող ինտեգրացիոն գործընթացները և բոլոր անդամ երկրների հետ միասնական շահերի մշակումը և հետապնդումը»,-ասել է նախարարը, հայտնում է ԱԳՆ մամուլի ծառայությունը։

ԱԳ նախարարը հայտարարել է նաև, որ ՀՀ արտաքին քաղաքականությունը հիմնված է 3 հիմնարար սկզբունքի վրա՝ ինքնիշխանություն, համահայկականություն, փոխգործակցություն, որոնք կապահովեն հայկական դիվանագիտության հարատև և շարունակական ընթացքը: