ՊՆ խոսնակ. Զինվորներից հարյուրավոր սմարթֆոններ են առգրավվել

PanARMENIAN.Net - Փետրվարի 29-ի և մարտի 1-ի ընթացքում ԶՈւ հրամանատարության և ՊՆ ՌՈ պրոֆիլակտիկ աշխատանքների ընթացքում զորքի մոտ հայտնաբերվել է մի քանի հարյուր սմարթֆոն, ֆեյսբուքյան իր էջում տեղեկացրել է ՊՆ խոսնակ Արծրուն Հովհաննիսյանը՝ հավելելով, որ դրանք բոլորը հանձնվելու են զինծառայողների ծնողներին։

2019-ի ձմեռային զորակոչին առաջին անգամ ժամկետային զինծառայողներին թույլատրվել է իրենց հետ բջջային հեռախոս տանել: Դրանցից օգտվելու կանոնակարգի համաձայն՝ զինծառայողին թույլատրվում է ունենալ բացառապես տեսագրման, ձայնագրման, լուսանկարման և ինտերնետ հնարավորություններ չունեցող բջջային:

«Հերթական անգամ հորդորում ենք զինծառայողներին և նրանց հարազատներին, զերծ մնալ զինծառայողներին չթույլատրված հեռախոսների տրամադրումից։ Դրանք վտանգում են իրենց կյանքը, ստորաբաժանման անվտանգությունը հարցականի տակ են դնում, առաջացնում են ոչ կանոնադրային մթնոլորտ»,- ասվում է գրառման մեջ:

Հանրապետական հավաքակայանում զինծառայողը ծանոթանում է բջջային հեռախոսակապով խոսակցությունների ժամանակ գաղտնիության ռեժիմի պահպանման պահանջներին: Զինծառայողը բջջայինից կարող է օգտվել միայն զորամասի օրվա կարգացուցակով նախատեսված ազատ ժամերին: