ԱԺ քառօրյայի օրակարգում 29 հարց կա

14 ապրիլի 2020 - 10:25 AMT

PanARMENIAN.Net - Ազգային ժողովում ընթանում է հերթական քառօրյան։ Օրակարգում 29 հարց է, այդ թվում` «Ապօրինի ծագում ունեցող գույքի բռնագանձման մասին» օրինագիծն ու «Պետական կենսաթոշակների մասին» օրենքներում փոփոխություններ և լրացումներ կատարելու մասին օրինագծերը:

Քառօրյաի օրակարգում է նաև Կենտրոնական բանկի նախագահի ընտրությունը, քանի որ ԿԲ նախագահ Արթուր Ջավադյանի պաշտոնավարման ժամկետը լրանում է հունիսի 1-ին:

ԿԲ նախագահի պաշտոնում «Իմ քայլը» խմբակցությունն առաջադրել է ԿԲ խորհրդի անդամ Մարտին Գալստյանի թեկնածությունը

Օրակարգում են նաև «Հայաստանի Հանրապետության պետական պարգեւների եւ պատվավոր կոչումների մասին» ՀՀ օրենքում լրացում կատարելու մասին, «Հեռուստատեսության եւ ռադիոյի մասին» ՀՀ օրենքում փոփոխություն եւ լրացումներ կատարելու մասին, Հայաստանի Հանրապետության ու Վերակառուցման եւ զարգացման միջազգային բանկի միջեւ «Կենսական նշանակության ճանապարհային ցանցի բարելավման ծրագրի երկրորդ լրացուցիչ ֆինանսավորում» վարկային համաձայնագիրը վավերացնելու մասին, «Սպառողական կրեդիտավորման մասին» Հայաստանի Հանրապետության օրենքում լրացումներ կատարելու մասին։