ԿԲ. Տեղահանված արցախցիների վարկերի մասով անհատական կամ ընդհանուր լուծումներ կառաջարկվեն

PanARMENIAN.Net - Արցախից բռնի տեղահանված քաղաքացիներին, որոնք վարկեր կամ ավանդներ են ունեցել Արցախում եղած բանկերում, կսպասարկեն նույն բանկերի հայաստանյան մասնաճյուղերը։ Այդ մասին հայտնել են Կենտրոնական բանկից, տեղեկացնում է «Հետքը»։

Կենտրոնական բանկի գնահատականով՝ տարհանված քաղաքացիների ֆինանսական սպասարկման հետ կապված կարող են խնդիրներ առաջանալ հիմնականում գրավադրված գույքի (ոսկով գրավադրված վարկերի) ֆիզիկական առկայության մասով, և վերջինիս վերաբերյալ տեղահանված քաղաքացիներն առաջին հերթին պետք է դիմեն իրենց սպասարկող բանկին՝ խնդիրները քննարկելու և լուծելու նպատակով:

«Արցախում գործող բանկերի բոլոր մասնաճյուղերը ՀՀ տարածքում լիցենզավորված և գրանցված բանկերի մասնաճյուղեր են: Համապատասխանաբար, քաղաքացիների սպասարկումն իրականացվում և իրականացվելու է անկախ նրանց գտնվելու վայրից։ Առանձնացված վիճակագրություն Կենտրոնական բանկը չի վարում և չի կարող տրամադրել»,- նշել են գլխավոր դրամատնից։

Առևտրային բանկերը, ըստ ԿԲ-ի, այս պահին գույքագրում են ստեղծված իրավիճակի հետևանքով առաջացած վերոնշյալ և հնարավոր այլ խնդիրները։ Խոստանում են արդյունքում Կառավարության և Կենտրոնական բանկի հետ գործակցությամբ անհատական կամ ընդհանուր լուծումներ առաջարկել։

ԿԲ-ից նաև հետաքրքրվել էինք՝ Հայաստանում ինչպե՞ս է կազմակերպվելու բռնի տեղահանված արցախցիների ավանդների և ի պահ տրված գումարների վերադարձը։ ԿԲ-ի պատասխանից հետևում է, որ բանկերը նույնությամբ կսպասարկեն քաղաքացիներին այնպես, ինչպես Արցախում են սպասարկել։

Թե որքան վարկեր և ավանդներ են եղել Արցախում գործող բանկերում, ԿԲ-ն տվյալներ չի հայտնել։ Գլխավոր դրամատնից նաև չեն մանրամասնել, թե ինչ անհատական կամ ընդհանուր լուծումներ կարող են առաջարկել արացախցիներին, որոնք վարկային պարտավորություններ ունեն բանկերի նկատմամբ։

Ադրբեջանը սեպտեմբերի 19-ին Արցախի դեմ լայնամասշտաբ հարձակում է իրականացրել՝ ամբողջությամբ զանգվածային հրետակոծության տակ առնելով երկիրը։ Սեպտեմբերի 20-ի առավոտվա դրությամբ մի շարք քաղաքներից ու գյուղերից ավելի քան 7000 մարդ էր տարհանվել, առնվազն 200 զոհ կար և 400 վիրավոր։ Բաքուն հայտարարել էր, որ չի դադարեցնի ռազմական գործողությունները, մինչև Արցախի ՊԲ-ն վայր չդնի զենքերը, ԱՀ իշխանությունն էլ չլուծարվի:

Սեպտեմբերի 20–ին հայտնի դարձավ, որ ԱՀ իշխանություններն ընդունել են ռուսական խաղաղապահ առաքելության հրամանատարության առաջարկը կրակի դադարեցման վերաբերյալ, ըստ էության համաձայնվելով Բաքվի պայմաններին՝ ՊԲ զինաթափում և լուծարում։ Սեպտեմբերի 21–ին Եվլախում հանդիպել են Բաքվի և ԼՂ ներկայացուցիչները, այնուհետև սեպտեմբերի 25-ին՝ Իվանյանում։ Սեպտեմբերի 24-ից արցախցիների բռնի տեղահանում է սկսվել, ԼՂ ղեկավարության խոսքով՝ բոլորը հեռանալու են երկրից: Սեպտեմբերի 28–ին ԱՀ նախագահ Սամվել Շահրամանյանը հրամանագիր է ստորագրել ԱՀ լուծարման մասին, որը ուժի է մեջ է մտնում 2024–ի հունվարի 1–ից։