Այսօր գարնանային գիշերահավասարի օրն է

PanARMENIAN.Net - Գիշերահավասարի օրն Արեգակը երկնքի հարավային կիսագնդից անցնում է հյուսիսային կիսագունդ, ինչն էլ աստղագիտական գարնան սկիզբն է: Ինչպես հաղորդում են հայկական աստղագիտական ընկերությունից ` մարտի 20-ին` Գրինվիչի ժամանակով 05:14-ին, Արեգակը կգտնվի Երկրի հասարակածի հարթության մեջ և նրա անցումը հասարակածով կտևի մոտ 33 ժամ: Այդ օրը կոչվում է գարնանային գիշերահավասարի օր, այսինքն` գիշերվա և ցերեկվա տևողությունները հավասարվում են:

Աստղագետները գարնանային գիշերահավասարի կետի հետ են կապում երկնային հասարակածային կոորդինատների հաշվանքի համակարգը: Գարնանային գիշերահավասարի օրը որոշ իսլամական երկրներում համարվում է նոր տարվա սկիզբը (Նովրուզ), որը ծագում է դեռ զրադաշտական կրոնի ժամանակներից և շուրջ 3000 տարվա պատմություն ունի:

Մեզ մոտ ամենասիրված եկեղեցական շարժական տոներից մեկի` Զատիկի, օրվա հաշվարկն էլ կապված է գարնանային գիշերահավասարի օրվա հետ: Այսպես, ամեն տարի Զատիկի օրը գարնանային գիշերահավասարից հետո առաջին լիալուսնից հետո եկող առաջին կիրակին է, և այս տարի կնշվի ապրիլի 8-ին: