Աթենքում տեղի ունեցավ «Հայաստան» հիմնադրամի Հունաստանի տեղական մարմնի առաջին միջոցառումը

PanARMENIAN.Net - Սեպտեմբերի 25-ին Աթենքում տեղի ունեցավ «Հայաստան» համահայկական հիմնադրամի Հունաստանի տեղական մարմնի գալա-ճաշկերույթը, որը կազմակերպվել էր Հունաստանում Հայաստանի դեսպանության հովանու ներքո և «Յունիսթրիմ միջազգային դրամական փոխանցումներ» կազմակերպության աջակցությամբ: Ճաշկերույթն անցկացվեց Աթենքում ընթացող «Հայկական շաբաթ» միջոցառումների շրջանակներում:

Միջոցառմանը ներկա էին ՀՀ արտակարգ և լիազոր դեսպան Գագիկ Ղալաչյանը և դեսպանատան անձնակազմը, տեղի հոգևոր առաջնորդները, ավանդական կուսակցությունների և հայկական կազմակերպությունների ներկայացուցիչներ, ինչպես նաև հայ համայնքի բազմաթիվ բարեկամ հույներ:

Բացմանը Հիմնադրամի Հունաստանի տեղական մարմնի ատենապետ Վաչե Տեր Կարապետյանը, ողջունելով ներկաներին հիշեցրեց, որ Հիմնադրամի մեծ ընտանիքի այս նորաստեղծ մարմինը կարճ ժամանակահատվածաում արդեն ոտքի է կանգել և այժմ ակնկալում է հայ համայնքի բոլոր անդամների ակտիվ մասնակցությունը, որպեսզի կառույցը կարողանա լավագույնս օժանդակել հայրենիքի զարգամանն ու բարգավաճմանը: Ատենապետը ներկայացրեց և շնորհակալություն հայտնեց հունահայ բարերարներ, քույր և եղբայր Անդրանիկ և Փերուզ Եոլճեաններին, ովքեր Հիմնադրամին նվիրաբերել էին 30 հազար եվրո:

«Հունաստանի տեղական մարմինը մեկ տարվա պատմություն ունի, բայց արդեն կարողացել է իր շուրջ համախմբել տեղի հայ համայնքին, ինչի վկայությունն էր նրանց ակտիվ մասնակցությունը 150 հոգանոց ճաշկերույթին: Ուրախ եմ, որ հանձինս Վաչէ Տեր Կարապետյանի Հունաստանում գտանք այն ատենապետին, ով վայելում է համայնքի սերն ու վստահությունը. տեղական մարմնի հաջողությունների համար նաև նրան ենք պարտական: Համոզված եմ, որ առաջիկայում Հայաստանում կամ Արցախում նորաբաց ծրագրերի ցուցանակներին կտեսնենք «Հովանավոր` Հիմնադրամի Հունաստանի տեղական մարմին» գրությունը»,- նշեց հիմնադրամի գործադիր տնօրեն Արա Վարդանյանը:

Միջոցառման ընթացքում ցուցադրվեց Հիմնադրամի գործունեությունը և ձեռքբերումները ներկայացնող ֆիլմ, որին հաջորդեց ազգային երգուպարով հագեցած համերգային մաս` ասմունքող Կարո Պարտաքճյանի, երգիչ Ներսիկ Իսպիրյանի և այլ սիրված արվեստագետների կատարումներով, հաղորդում է «Հայաստան» համահայկական հիմնադրամի մամլո ծառայությունը: