Արտաշատի «Բերքի տոնը» առաջնորդվում էր «նայեք, բայց ձեռք մի տվեք» կարգախոսով

 15 հոկտեմբերի 2011 - 18:14 AMT

PanARMENIAN.Net - Այսօր` հոկտեմբերի 15-ին Արտաշատ քաղաքի հիմնադրման 2200-ամյակին նվիրված միջոցառումների շարքում էր մարզային «Բերքի տոն 2011»-ը: Արարատի մարզի քաղաքային և գյուղական համայնքների ներկայացուցիչները տոնի մասնակիցներին ներկայացրեցին իրենց աշխատանքի արդյունքները. սակայն, միայն ներկայացրեցին: Ըստ ավանդույթի, նման ցուցահանդեսները ուղեկցվում են նաև համտեսով: Ըստ նախատեսվածի, այստեղ ևս պետք է լիներ համտեսի արարողություն: Սակայն մարզի ներկայացուցիչների մեծ մասը իր տաղավարում առաջնորդվում էր «նայեք, բայց ձեռք մի տվեք» կարգախոսով: Բոլոր տաղավարներում սնունդը մնաց գրեթե սկզբնական ձևով:

Հեռուստաընկերություններից մեկի ներկայացուցչին բավական մեծ ժամանակ է պահանջվել համոզելու տաղավարի տիրոջը, նկարահանման համար մեկ փոքրիկ կտոր ուտելիք տրամադրել: Տաղավարի տերը դա պատճառաբանում էր ՀՀ նախագահի այցով, իբր «նախագահը գնա, նոր»: Այնուամենայնիվ, նախագահի Ցուցահանդեսից դուրս գալուց հետո տաղավաարները իրոք որ դատարկվեցին: Ցուցահանդեսի գեղագիտորեն ձևավորված նմուշները ինչպես տերերը բերել էին, այդպես էլ ետ տարան, կամ բաժանեցին իրենց հարազատներին: