Սամվել Կարապետյան. Խաչքարերի մշակույթը բնորոշ է նաև ուդիներին, քանի որ նրանք հայկական մշակույթի կրողներ են

PanARMENIAN.Net - Խաչքարերի մշակույթը բնորոշ է նաև ուդի ազգության համար, քանի որ նրանք ընկալել են հայ մշակույթը: Այդ մասին Երևանում մամլո ասուլիսում հայտարարել է հայկական հուշարձանների ուսումնասիրման ՀԿ-ի ղեկավար Սամվել Կարապետյանը: Նրա խոսքերով, հայերից բացի, ուդիները միակն են, որոնք ստեղծել են խաչքարեր: Միաժամանակ, նա նշել է, որ ուդիները դավանել են հայ լուսավորչական հավատը, խոսել են հայերեն և ինչ-որ ժամանակ իրենց հայ են համարել: Հայ փորձագետը նաև նշել է, որ նրանց խաչքարերը գրեթե չեն տարբերվում հայկական խաչքարերից: «Միակ տարբերությունը` խաչքարերի հեղինակների անուններն են»,- ասել է Կարապետյանը:

Անդրադառնալով նրան, որ ադրբեջանական կողմը փորձել է համոզել ՅՈՒՆԵՍԿՕ-ի ոչ նյութական մշակութային ժառանգության պահպանության հանձնաժողովին, որ խաչքարերը պատկանել են ոչ միայն հայերին, այլ նաև ուդիներին, որոնք, ադրբեջանական կողմի պնդմամբ, ոչ մի կապ չեն ունեցել հայերի հետ՝ Կարապետյանը նշել է, որ դրանք սխալ պնդումներ են, քանի որ ուդիների խաչքարերը հայկական մշակույթի դրսևորում են:

Նոյեմբերի 17-ին հանձնաժողովը, քննարկելով Հայաստանի մշակույթի նախարարության հայտը, որոշում է ընդունել հայկական խաչքարի արվեստը, խաչքարի խորհուրդը և խաչքարագործությունն ընդգրկել ՅՈՒՆԵՍԿՕ-ի մարդկության ոչ նյութական մշակութային ժառանգության հեղինակավոր ներկայացուցչական ցանկի մեջ: Նշենք, որ այս փաստն առաջացրել է Ադրբեջանի դժգոհությունը, որի ձեռքերով Ջուղայում ոչնչացվել են 1000 հայկական խաչքարեր: