XterNet-ի բաժանորդները մի քանի շաբաթ առաջ հանկարծակի մնացին առանց Ինտերնետի: Մոտ մեկ ամիս առաջ ընկերությունը դադարեցրեց կայքերի հոսթինիգի սպասարկումը: Ավելի ուշ անհնար էր կապվել պրովայդերի հետ: Որոշ տվյալներով, ընկերության տնօրենը գտնվում է Հայաստանի սահմաններից դուրս: «Ղեկավարությունը կապ չի հաստատում մեզ հետ: Արդեն 2-3 շաբաթ է` սկսվել է XterNet ընկերության հոսթինգ-ծառայություններից օգտվողների անցումն այլ պրովայդերների սերվերի»,- PanARMENIAN.Net-ին հայտնել է «Ինտերնետ հասարակություն» հասարակական կազմակերպության նախագաh Իգոր Մկրտումյանը:

Երևանում հունիսի 16-ին ՀՀ-ԵՄ համագործակցության ենթակոմիտեի առևտրի, տնտեսական ու համապատասխան իրավական հարցերի գծով հերթական` իններորդ նիստում քննարկվեցին ԵՄ հետ Հայաստանի առևտրի ազատ գոտու հիմնավորման հնարավորությունները: Բարձրացվեցին նաև մակրոտնտեսական զարգացումները Հայաստանում, ԵՄ-ի հետ Խորը և համապարփակ ազատ առևտրի տարածք հիմնելու հնարավորությունները, ստանդարտացում, տեխնիկական կանոնակարգեր, համապատասխանության հավաստում, սանիտարական և բուսասանիտարական չափանիշներ, մտավոր սեփականություն, հարկային ու մաքսային ոլորտին վերաբերող հարցեր: Բացի այդ, նիստում քննարկվեցին ԵՄ-ի կողմից տեխնիկական աջակցության, առևտրի հետ կապված հարցեր` ներառյալ կառավարման պետական մարմինների համապարփակ զարգացման ծրագրի (CIB) նախապատրաստական աշխատանքները:

Քաղաքական շաբաթը Հայաստանում նշանավորվեց Երևանում Սոցինտերնի խորհրդաժողովի աշխատանքով: Հունիսի 12-ին Երևանում աշխատանքն ավարտեց ԱՊՀ երկրների, Կովկասի և Սևծովյան ավազանի պետությունների Սոցինտերնի կոմիտեի համաժողովը: Համաժողովին մասնակցում էին ԱՊՀ երկրների և Եվրոպայի 13 երկրների կուսակցություններ, մասնավորապես` Ռուսաստանի, Վրաստանի, Ղազախստանի, Բելառուսի, Մոլդովայի, Հունաստանի, Հունգարիայի, Գերմանիայի, Լեհաստանի, Շվեդիայի, Պաղեստինի և Ադրբեջանի սոցիալիստական կուսակցությունների ներկայացուցիչները: Համաժողովի արդյունքներն ամփոփելով` Սոցինտերնի գլխավոր քարտուղար Լուիս Այալան հայտնել է, որ իրենց հաջողվել է իրականացնել այն ամենն, ինչ երկու օրվա ընթացքում ծրագրել էին: «Մեր հիմնական նպատակն է ժողովրդավարություն տարածել այն բոլոր երկրներում, որտեղ մենք ներկայացված ենք: Իսկ մի շարք երկրներում, ինչպես, օրինակ` Հայաստանն է, մենք կարողացանք բաց հասարակություն ձևավորել, իսկ որոշ երկրներում այդ գործընթացը շատ երկար է տևում», - նշել է նա:

Հայաստանի և Ադրբեջանի նախագահների հերթական հերթապահ հանդիպումն ավարտվեց այնպես, ինչպես նախորդ հինգը: Այսինքն`անարդյունք: Կարելի է ենթարդրել, որ նախագահներից յուրաքանչյուրն հանդիմանանքի իր բաժինը ստացավ Դմիտրի Մեդվեդևից` Իլհամ Ալիևը մշտական դատարկ սպառնալիքների համար, Սերժ Սարգսյանը անզիջում դիրքորոշման համար: Ադյպես էլ բաժանվեցին` պայմանավորվելով շարունակել խորհրդակցությունները Մադրիդյան սկզբունքների հիման վրա:

Հայ-ռուսական մշակութային կապերը խորացման ներուժ ունեն: Այդ մասին հունիսի 12-ին հայտնել է ՀՀ Ազգային անվտանգության խորհրդի (ԱԱԽ) քարտուղար Արթուր Բաղդասարյանը «Եվրասիա» ակադեմիայի նախագահ Օլեգ Պոպցովի, Մոսկվայի հեռուստատեսային և ռադիոհեռարձակման ինստիտուտի ռեկտոր Վասիլի Կորելսկիի, «ՏՎՑ» հեռուստաընկերության քաղաքական տեսաբան Լեոնիդ Իոֆեի և Հայաստանի հեռուստատեսության և ռադիոյի ակադեմիայի ռեկտոր Համլետ Ղուշչյանի հետ հանդիպմանը: «Մեզ համար շատ կարևոր են Հայաստանի և Ռուսաստանի միջև մշակութային կապերի առավել խորացմանն ուղղված հայ և ռուս մտավորականների ջանքերը»,- ընդգծել է Արթուր Բաղդասարյանը: Վերջին շաբաթվա իրադարձությունները ցույց են տալիս, որ այդ հարաբերությունների զարգացումը շատ բարձր մակարդակում է:

Վանի թագավորության հնագույն ամրոց Էրեբունիի (մ.թ.ա. 782թ.) տարածքում պեղումները հանգամանքների բերումով անցկացվել են փուլ առ փուլ: Խորհրդային շրջանում վերջին հետազոտություններն այստեղ անցկացվել են 60-ականների վերջին: Հետագայում արդեն հետխորհրդային շրջանում (1990թթ.) դրանք շարունակվել են: Երեք տարվա ընթացքում Հայաստանի և Ֆրանսիայի հնագետները հնագիտական պեղումներ են անցկացնում Վանի թագավորության հնագույն ամրոցի` Էրեբունիի տարածում: Պեղումները ֆինանսավորում են մշակույթի նախարարությունը և Ֆրանսիայի ԱԳՆ-ն:

Բռնցքամարտ. Մոսկվայում հունիսի 8-ին բռնցքամարտի Եվրոպայի առաջնությունում կայացել են քառորդ եզրափակչի մենամարտերը: Հայաստանի հավաքականը ներկայացնում են 10 բռնցքամարտիկներ, որոնցից 3-ը` Արթուր Խաչատրյանը (81 ք/կ), Հովհաննես Դանիելյանը (48ք/կ) և Հրաչիկ Ջավախյանը (64ք/կ) դուրս են եկել կիսաեզրափակիչ: Նրանք արդեն բրոնզե մեդալներ ունեն, իսկ եզրափակիչ դուրս գալու համար հունիսի 11-ին կմրցեն կիսաեզրափակչի մարտերում: