Ընդդիմադիր ՀԱԿ-ի հանրահավաքը Երևանում. Վարդեր, իտալական տենոր, միլիոններ և հեղափոխություն 30 վայրկյանում 20 ապրիլի 2012 - 23:02 AMT PanARMENIAN.Net - Երևանում կայացել է Հայ ազգային կոնգրեսի հերթական հանրահավաքը: Հանրահավաքը մեկնարկեց 40 րոպե ուշացումով բեմի պատճառով, որն Ազատության հրապարակում կառուցել են ապրիլի 22-ին կայանալիք իտալացի տենոր Անդրեա Բոչելիի համերգի համար: ՀԱԿ-ի ներկայացուցիչները խորհրդակցեցին, թե որտեղ կարելի է անցկացնել հանրահավաքը, բայց և այնպես որոշեցին այն անցկացնել Ազատության հրապարակում: Վարդեր կիսախավարում Հանրահավաքը մեկնարկեց: Երբ հարթակ բարձացավ ՀՀ առաջին նախագահ Լևոն Տեր-Պետրոսյանը, նրան հանրահավաքի մասնակիցները դիմավորեցին ծափողջյուններով ու «Լևոն, Լևոն» վակարկումներով, մի կին անգամ նրան վարդեր նվիրեց: Ընդ որում հարկ է նշել, որ թեև հանրահավաքի կազմակերպիչները բերել էին հանրահավաքի համար անհրաժեշտ բոլոր սարքերը, հրապարակը հանրահավաքի ամենասկզբում հոսանքազրկված էր, ինչը վրդովեց ընդդիմությանը: Առաջինը ելույթ ունեցավ թիվ 1 ընտրատարածքում առաջադրված պատգամավորի թեկնածու Գայանե Առուստամյանը, ով հայտնել է. «Մեր ազատամարտը ռեժիմի դեմ սկսվել է: Հասել է այն պահը, երբ որոշվելու է սերունդների հետագա ճակատագիրը: Այս ռեժիմը պետք թոթափել, և ֆաշիստներից մեր երկիրը թոթափելու հնարավորությունը մայիսի 6-ի ընտրություններն են: Ես` որպես մեծամասնական պատգամավորւթյան թեկանծու, զրկված լինելով եթերից, գնում եմ մարդկանց տները, զրուցում նրանց հետ: Իրականում ժողովուրդը քաջ գիտակցում է իրավիճակը: Մարդիկ մտավախություն ունեն, որ ցուցակներում կարող են ներգրավել մահացածների անունները»: Նա կոչ է արել քվեարկել ՀԱԿ-ի օգտին, քանի որ ՀԱԿ-ն է միակ իրական ընդդիմադիր ուժը, որը պայքարում է ֆաշիզմի դեմ: «Մի վախեցեք, որ ասում են` միայն մենք ենք անցնելու, գնացեք քվեարկության: Այն փակ և գաղտնի է»,- ասել է նա: Տապալել իշխանությունը 30 վայրկյանում «Հայկական ժամանակ» թերթի գլխավոր խմբագիր Նիկոլ Փաշինյանն իր հերթին հորդորել է հավաքվածներին չվախենալ և չհավատալ, թե ընտրախցիկներում տեսախցիկներ կան. «Մենք ձեզնից չենք ակնկալում, որ պայքարեք օլիգարխիայի դեմ: Երբ ձեր դուռը ծեծեն ու հարցնեն, թե ում եք ընտրելու, ասեք, որ ՀՀԿ-ի օգտին եք քվեարկելու: Բայց երբ վերցնում եք քվեաթերթիկը, 30 վայրկյանանոց հեղափոխությունը սկսվում է»: Փաշինյանը հորդորել է մարդկանց չվախենալ և չհավատալ, թե ընտրախցիկներում տեղախցիկներ կան: «Հեղափոխությունը», նրա խոսքով, տևելու է 30 վայրկյան: Նրա ելույթի ժամանակ հարթակ են բարձրացել ՀԱԿ երիտասարդ ակտիվիստներ, որոնք կրում էին «30 վայրկյան» գրառումով շապիկներ: Նախընտրական քարոզարշավի հաշվապահական հաշվարկը Իսկ Հայոց համազգային շարժման վարչության նախագահ Արամ Մանուկյանը, ելույթ ունենալով Հայ ազգային կոնգրեսի հանրահավաքի ժամանակ, պատմել է, թե ով և ինչքան է ծախսել նախընտրական քարոզարշավի վրա: Նրա խոսքով` ՀԱԿ-ն այս քարոզարշավում 4 մլն դրամ է ծախսել, ՀՅԴ-ն` 20 միլիոն, ՕԵԿ-ը` 17, «Ժառանգությունը»` 37, իսկ ՀՀԿ-ն 50 միլիոն: «Ես 800 տուն եմ մտել ու հասկացել, որ ՀՀԿ-ն ձայն չունի այս երկրում»,- ընդգծել է նա: Ընկնելով Ղարաբաղի հետևից ՀԱԿ-ի հանրահավաքի ժամանակ թիվ 2 ընտարատարածքում առաջադրված թեկնածու Վլադիմիր Կարապետյանը խոսել է Հայաստանի արտաքին քաղաքականության մասին` նշելով, որ Հայաստանի համար շատ վտանգավոր է համարում ապրիլի 3-ին Բաքվում տեղի ունեցածը. «Ադրբեջանի և Ռուսաստանի արտգործնախարարների ստորագրած փաստաթղթում նշվում է, որ Ղարաբաղի հակամարտության կարգավորումը լինելու է Ադրբեջանի տարածքային ամբողջականության շրջանակում: ՀՀ-ն ու Արցախը որևէ կերպ չեն արձագանքել դրան, այնքան է Հայաստանի իշխանությունը բաց թողել բանակցային գործընթացը, որ անգամ չի կարողանում արձագանքել»: Ելույթում թեկնածուն խոսել է նաև օրերս Եվրախորհրդարանի ընդունած բանաձևի մասին, որում նշված է, որ Հայաստանը չպետք է զինծառայողներ ուղարկի Արցախ ծառայության: «Դրանից հետո մեկ քայլ է մնում, որ մեզ հայտարարեն զավթիչ: Այս ամենը ռեժիմի հերթական հանցավոր ձախողումներն են»,- ամփոփել է իր խոսքը Վլադիմիր Կարապետյանը: Ստեփան Դեմիրճյանի հոռետեսական կանխատեսումները ՀԺԿ առաջնորդ Ստեփան Դեմիրճյանը, խոսելով արտագաղթի աճի, համատարած աղքատության մասին, նշել է, որ այդ ամենի մեղավորը կոալիցիան է. «ՀԱԿ-ն ունի համապատասխան կամք ու ներուժ երկիրն այս վիճակից դուրս բերելու համար, մայիսի 6-ին պետք է դնենք մեր երկրի համար անհրաժեշտ փոփոխությունների հիմքը»: Նա նշել է, որ եթե իշխանությունը վերարտադրվի ԱԺ-ն նորից կդառնա գործադիրի կցորդը. «Արդյունքում ունենալու ենք էլ ավելի մեծ արտագաղթ ու բարոյական անկում: Եթե մենք ուզում ենք ապրել ժողովրդավարական երկրում, մենք պետք է փոխենք այս իշխանությունը»: Բիզնես-կենտրոններ դպրոցների փոխարեն և Հրանտ Բագրատյանի եկամուտները Ազատության հրապարակում այս պահին տեղի ունեցող ՀԱԿ հանրահավաքին ՀԱԿ անդամՀրանտ Բագրատյանը խոսել է օտարերկրյա վարկերի մասին` ասելով, որ «դրանց մեծ մասը բաժանում են օլիգարխներին, ոչ թե հոգում հասարակ քաղաքացու հոգսերը»: «Ամեն տարի հայտարարում են, թե աշխատեղեր են ավելացրել, բայց արդյունքում մեր երկրում ոչ մեկն աշխատանք չունի»,- ընդգծել է նա: «Երկուշաբթի օրվանից գրանցելու ենք այն բոլոր քաղաքացիների անուն-ազգանունները, որոնք տուժել են իշխանությունների տնտեսական հանցագործություններից»,- իր ելույթում նշել է նախկին վարչապետը: Նա ասել է, որ մայիսի 6-ը վերջնական է, իրենք գնալու են մինչև վերջ. « Non stop գնում ենք մինչև իշխանափոխություն»: Երկխոսությունն ու համաշխարհային ընդդիմության նախանձը ՀԱԿ-ի Ազատության հրապարակում տեղի ունեցած հանրահավաքին ՀԱԿ-ի առաջնորդ Լևոն Տեր-Պետրոսյանը, խոսելով ընտրությունների վերահսկման միասնական շտաբի(ՀԱԿ, ՀՅԴ, ԲՀԿ) մասին, նշեց, որ մարդիկ կան, որոնք լծվել են այդ շտաբը վիժեցնելուն: Դա, ըստ նրա, արվում է Սերժ Սարգսյանին պահելու համար: «Երկխոսությունը համարում եմ Հայաստանի քաղաքական էթիկայի ամենամեծ նվաճումը: Դրա շնորհիվ է, որ ազատ արձակվեցին քաղբանտարկյալները, մեզ հաջողվեց ետ բերել Ազատության հրապարակը, մարտի 1-ի բացահայտման գործը»,-ասել է ՀԱԿ առաջնորդը. «Աշխարհի ցանկացած ընդդիմություն կնախանձեր Հայ ազգային կոնգրեսին, որը կարողացավ այսպիսի նվաճումներ արձանագրել»: 21-րդ դարի Հայոց ցեղասպանություն` հղում կատարելով Շառլ Ազնավուրին Լևոն Տեր-Պետրոսյանը կրկին հայտնել է, որ «ներկայիս վարչակարգի կառավարման արդյունքը դարձել է մեկ միլիոն մարդկանց արտագաղթը Հայաստանից. այդ ցուցանիշը կարելի է համեմատել հայերի տեղահանման և ցեղասպանության հետ Օսմանյան Թուրքիայում»: «Մարդիկ, ովքեր աշխարհից պահանջում են ճանաչել Հայոց ցեղասպանությունը, գրեթե նույն ցեղասպանությունն իրագործում են սեփական երկրում: Եվ դա, կխնդրեի նկատել, ասել եմ ոչ թե ես, այլ Շվեյցարիայում Սերժ Սարգսյանի կողմից նշանակված դեսպան Շառլ Ազնավուրը»,- ասել է Տեր-Պետրոսյանը: Արտագաղթից հետո, նրա խոսքով, իշխող վարչակարգի գործունեության ևս մեկ արդյունքը դարձել է կոռուպցիան: Տեր-Պետրոսյանը նշել է, որ «գոյություն ունեն Հայաստանի ստվերային տնտեսության վերաբերյալ զանազան միջազգային հետազոտություններ, որոնց համաձայն` ստվերային տնտեսությունը կազմում է երկրի տնտեսության 1/3-ը, այսինքն, 1/3-ը մտնում է բյուջե, իսկ մնացած մասը գրպանվում է»: ՀԱԿ-ի առաջնորդը հայտնել է, որ եթե այդ միջոցները մտնեին բյուջե, ապա այսօր հնարավոր կլիներ կրկնապատկել կենսաթոշակներն ու նպաստները, եռապատկել ռազմական և գիտական ծախսերը, ինչպես նաև աշխատավարձերը: «Այդ մարդիկ, ովքեր թալանում են սեփական երկիրը, ուզում են երկրորդ անգամ հաղթել Ադրբեջանի՞ն,- հարց է տալիս Տեր-Պետրոսյանը:- Գործող իշխանությունների ևս մեկ հանցագործությունն այն է, որ երկրի քաղաքացիներն անպաշտպան են դարձել»: Նրա խոսքով` եթե քաղաքացու մոտ խնդիրներ են ծագում, նա խուսափում է ոստիկանություն կամ դատարան դիմելուց: Տեր-Պետրոսյանն ընդգծել է, որ ոստիկանությունն ու դատարանը հանցագործի հետ անմիջական գործարքներ են կնքում և մեղավոր ճանաչում այն քաղաքացուն, ով դիմել է իրենց: ՀԱԿ-ի առաջնորդն անդրադարձել է նաև բանակում զինվորների անպաշտպանության հարցին` մատնանշելով, որ «ներկայումս զինվորներին հայկական բանակում տանջում են, սպանում կամ հասցնում ինքնասպանության»: Հաջորդ հանրահավաքը մայիսի 3-ին Ազատության հրապարակում ՀԱԿ-ի հանրահավաքին Լևոն Տեր-Պետրոսյանի ելույթից հետո ՀԱԿ-ի անդամ Արամ Մանուկյանն ասել է, որ վաղվանից ՀԱԿ-ը շարունակում է մարզային հանդիպումները, իսկ հաջորդ հանրահավաքը տեղի կունենա մայիսի 3-ին։ Ապրիլի 24-ին Հայ ազգային կոնգրեսը երթ է անցկացնելու Ազատության հրապարակից Ծիծեռնակաբերդ` հարգելու ՄԵծ եղեռնի զոհերի հիշատակը։ Ուշագրավ Նա հավելել է, որ որևէ երկիր չի կարող վիճարկել որևէ այլ երկրի մարտունակ բանակ ունենալու իրավունքը Նա նաև ասել է, որ Հայաստանի և Վրաստանի միջև սահմանազատման աշխատանքները վերսկսելու պայմանավորվածություն կա
Նրա գնահատմամբ՝ մտահոգիչ է նաև հատվածական սահմազատում և սահմանագծում իրականացնելը Դեսպանը նաև հրապարակել է Politico-ի հոդվածը «Thales» ընկերության ֆրանսիական ռադարների մասին Ամենաընթերցվողը բաժնում | Օդի ջերմաստիճանն մայիսի 2–ից կնվազի 7-10 աստիճանով Քամին՝ հարավարևելյան՝ 2-5մ/վ, ամպրոպի ժամանակ սպասվում է քամու ուժգնացում Ծիծեռնակաբերդում Աննա Հակոբյանին առնչվող միջադեպով 1 անձի մեղադրանք է առաջադրվել Մյուսներն արգելանքից ազատ են արձակվել, քրեական հետապնդում չի հարուցվել Նարեկ Մանասյանը՝ բռնցքամարտի ԵԱ արծաթե մեդալակիր Ավելի վաղ Եվրոպայի առաջնության փոխչեմպիոն էր դարձել Բարեղամ Հարությունյանը Քոչարյանից պահանջում են բռնագանձել 25 անշարժ գույք, 5 տրանսպորտային միջոց, արժեթղթեր Պահանջն առնչվում է նրա հետ փոխկապակցված 7 անձի |