ԷՍՏՈՆԻԱՅՈՒՄ ԼՈՒՅՍ Է ՏԵՍԵԼ «ՀԱՅԿԱԿԱՆ ՀԱՐՑԸ» ԳԻՐՔԸ

PanARMENIAN.Net - Մարտի 4-ին Էստոնիայի ազգային գրադարանում կայացել է Տալլինի բարձրագույն տեխնիկական դպրոցի դոցենտ Լեմբո Տանինգի «Հայկական հարցը» գրքի շնորհահանդեսը, հաղորդում է էստոնական «Ռադիո-4» ռադիոկայանի Ծիծեռնակ հաղորդումը: Գիրքը ծանոթացնում է ընթերցողին Հայաստանի պատմությանը, պատմում է Մեծ Հայաստանի, ինչպես նաեւ Օսմանյան Թուրքիայի լծի մասին: Գրքում բերված են Հայաստանի հանրապետության տնտեսական ցուցանիշները ԱՊՀ մյուս երկրների համեմատությամբ, ինչպես նաեւ անդրադարձ է արված Հայաստանի եւ Էստոնիայի հարաբերություններին: Գրքում կենտրոնական տեղ է գրավում Օսմանյան Թուրքիայում Հայոց ցեղասպանության թեման, խորհրդային ժամանակաշրջանում հայերի արտաքսման փաստերը: Ստեղծագործության մեջ նշված են նաեւ մարդկության դեմ 20-րդ դարում կատարված ոչ միայն թուրքերի կողմից, այլ բոլշեվիկների կողմից Եվրոպայի մյուս ժողովրդների, այդ թվում եւ էստոնացիների հանդեպ կատարված այլ հանցագործություններ: Բացի այդ, գրքում բերվում են Հայոց ցեղասպանությունը հաստատող բազմաթիվ փաստեր, ինչպես նաեւ Հայոց ցեղասպանության հանդեպ այն ժամանակվա մեծ տերությունների եւ ներկայիս աշխարհում դրա հանդեպ վերաբերմունքի մասին պատմող նյութեր: «Հայկական հարցը» գիրքը Էստոնիայի պատմության մեջ առաջին գիրքն է էստոներենով, որն այդքան մանրամասն լուսաբանում է հայ ժողովրդի պատմությունը եւ Հայոց ցեղասպանության փաստը: Գրքի շնորհահանդեսին ներկա էին Էստոնիայի խորհրդարանի անդամներ, գիտության եւ մշակույթի հայտնի գործիչներ, երկրի ազգային փոքրամասնությունների, այդ թվում եւ հայ համայնքի ներկայացուցիչներ: