Մարդու իրավունքների պաշտպանի աշխատակազմի Շիրակի տարածքային գրասենյակը իրականացնում է ծրագիր, որի նպատակը տարածքային գրասենյակի և մարզային դպրոցների միջև ակտիվ համագործակցությունն է:
Ծրագրի առաջին փուլը նախատեսում է դասընթացների անցկացում մարզի դպրոցներում հասարակագիտության ուսուցիչների հետ, որոնց ընթացքում ուսուցիչները տեղեկատվական նյութերի միջոցով ընդգրկուն տեղեկատվություն կստանան Մարդու իրավունքների պաշտպանի գործունեության և լիազորությունների մասին: Այս փուլը մեկնարկել է երեկ` Գյումրի քաղաքի 20 դպրոցների ուսուցիչների հետ հանդիպումով: Սեմինարին անակնկալ մասնակցություն են ունեցել նաև այդ օրերին Գյումրիում գտնվող ԵԱՀԿ ԺՀՄԻԳ երկարաժամկետ դիտորդները: Սեմինարի ավարտին նրանք շնորհակալություն են հայտնել ծրագրի կազմակերպիչներին և բարձր գնահատել նմանատիպ միջոցառումների նշանակությունը քաղաքացիական հասարակության ձևավորման գործընթացներում:
Ըստ նախօրոք հաստատված ժամանակացույցի, հանդիպումներ կլինեն նաև մարզի մյուս դպրոցներում: Դպրոցների աշակերտներին ծրագրի շրջանակներում հնարավորություն կընձեռվի ուսուցիչների ուղեկցությամբ այցելել Պաշտպանի աշխատակազմի Շիրակի տարածքային գրասենյակ և տեղում ծանոթանալ գրասենյակի գործունեությանը:
