ՀՀ-ում առաջին անգամ կանցկացվի Businessgame-ը. հաղթողը կստանա 100 000 դրամ

27 մարտի 2013 - 11:07 AMT

PanARMENIAN.Net - Մեկնարկում է Businessgame նորարարական-ինտերակտիվ երիտասարդական խաղը: Businessgame-ն ընդունված է ամբողջ աշխարհում, Հայաստանում, սակայն, այն անցկացվում է առաջին անգամ։ Businessgame նորարարական խաղի առաջին ծրագրին կարող են մասնակցել բուհերի` մարքեթինգ, գովազդ, բիզնես, PR կամ այլ նման մասնագիտություններ ունեցող ուսանողները: Սա բիզնես գործունեության սիմուլյատոր է. բանկի տոկոսները, ապրանքների գները և այլ թվային ցուցանիշներ գործակիցներով համապատասխանում են ՀՀ շուկայում առկա թվերին:

Մասնակիցներից յուրաքանչյուրը հանդես է գալու գործարարի դերում: Ինտրիգային, հետաքրքիր և բիզնես հոտառություն պահանջող այս պայքարում կհաղթեն ամենաարագ կողմնորոշվողները: Հայաստանի երիտասարդական հիմնադրամի հասարակայնության հետ կապերի ծառայությունից PanARMENIAN.Net ին հայտնում են, որ խաղի բացումը տեղի կունենա ապրիլի 6-ին՝ ժամը 14.00։ Բոլոր նրանք, ովքեր ցանկանում են մասնակցել Businessgame խաղին, պետք է ներկա լինեն առաջին հանդիպմանը և լրացնեն մասնակցության հայտը: Ապրիլի 13-ին՝ ժամը 13:00, տեղի կունենա Businessgame-ի առանցքային փուլը. մասնակիցները, հանդես գալով որպես գործարարներ, կփորձեն իրենց բիզնես գիտելիքները։ Լավագույնները կստանան հավաստագրեր և պատվոգրեր:

Ամենահաջողակ 3 գործարարները կստանան գումարային պարգևներ և արժեքավոր մրցանակներ (1-ին տեղ` 100.000 դրամ, 2-րդ տեղ` 50.000 դրամ, 3-րդ տեղ` 25.000 դրամ): Ապրիլի 14-ին՝ ժամը 14:00, կանցկացվի Businessgame-ի առաջին ծրագրի եզրափակիչ փուլը: Հրավիրված մասնագետներին կներկայացվեն խաղի էությունը, սոցիալական նշանակությունը, տեսլականը և ապագա ծրագրերը: Բիզնես խաղի առաջին ծրագիրը նվիրված է ՀՀ ձկնաբուծության ոլորտին, որը վերջին տարիներին էական առաջընթաց է գրանցել արտահանման բնագավառում։ Businessgame-ն իրականացնում են Հայաստանի երիտասարդական հիմնադրամը և «Մերքեթինգի (շուկայագիտության) հայկական ակումբ» ՀԿ-ն։

Հղումներ թեմայով.

http://marketingclub.am