Էդուարդ Հովհաննիսյան. Դեղին համարանիշերով տաքսիների վերաբերյալ որոշումն անտրամաբանական է

PanARMENIAN.Net - «Աքիլլես» ՀԿ նախագահ Էդուարդ Հովհաննիսյանը գտնում է, որ կառավարության որոշման մեջ տրամաբանություն չկա. «Մենք առաջարկեցինք դեղին համարանիշերով տաքսիներին զեղչեր տալ, օրինակ՝ մի տարի հարկերը չմուծեն: Սակայն չարձագանքեցին»:Վերջիվերջո, ծագեց այն հարցը, որ կառավարությունը վերադարձավ այն ելակետային տվյալներին, ինչ կար մինչև դեղին համարանիշ ունենալը››:

Էդուարդ Հովհաննիսյանի համոզմամբ՝ այս ոլորտում ամենամեծ սխալն այն է, որ ԱԺ-ն լիազորել է կառավարությանը՝ երթևեկության կանոններ գրել: Նա նշեց, որ վերջին տարիների ընթացքում հաճախակի են երթևեկության կանոնների փոփոխությունները, սակայն վերջում հանգում են ելակետային օրենքների հաստատմանը:

ՀՀ կառավարության մարտի 28-ի նիստում ՀՀ կառավարության աշխատակազմի Օրենսդրության կարգավորման ազգային կենտրոն ծրագրերի իրականացման կենտրոն պետական հիմնարկի տնօրեն Արմեն Եղիազարյանը ներկայացրել է տրանսպորտի ոլորտում բարեփոխումների փաթեթը:

Համաձայն փաթեթի՝ առաջարկվում է Երևանից դուրս մեկ պատուհանի սկզբունքով լիցենզավորման գործընթացներում փաստաթղթերի ներկայացման և ստացման կարգ:

Ֆիզիկական անձանց կողմից մեկ ավտոմոբիլով մարդատար-տաքսի ուղևորափոխադրումների իրականացման ժամանակ առաջարկվում է միավորել հարկը և պետական տուրքը՝ հետևյալ տրամաբանությամբ՝ Երևան քաղաքում ամսական՝ բազային տուրքի 12-ապատիկի չափով կամ եռամսյակային՝ բազային տուրքի 34-ապատիկի չափով կամ տարեկան՝ բազային տուրքի 120-ապատիկի չափով: Այլ քաղաքներում գումարն ավելի քիչ է: Ընդ որում, պետական տուրքը գանձվում է ըստ հայտատու ֆիզիկական անձի հաշվառման վայրի: Սա նաև հնարավորություն կտա հարկային հաշվետվություններ չներկայացնել, ինչը կազատի վարորդներին՝ նման ծառայություններ մատուցողներին 3000 դրամ վճարելուց: Կազմակերպությունների համար սահմանվում է լիցենզիայի պետական տուրք՝ յուրաքանչյուր ավտոմեքենայի համար տարեկան 25.000 դրամ մինչև 8 մեքենա, իսկ 8-ից ավելը՝ 200.000 դրամ: Սա հնարավորություն կտա խուսափել տուրքի կտրուկ աճից: Հանվել է դեղին հիմնագույնի համարանիշների պահանջը և փոխարենը սահմանվել է ինքնակպչուն կտրոններ, ինչը շուկա մտնող նոր բիզնեսին կազատի 17.000 դրամկատարվող պետական տուրքի վճարումից: Հանվել են ամենօրյա բուժզննման և տրանսպորտային միջոցի տեխզննման պահանջները, հավաքակայան ունենալու պահանջը: Սա հնարավորություն կտա կրճատել կոռուպցիոն ռիսկերը, ինչպես նաև նախկինում համապատասխան փաստաթղթերը ձեռք բերելու համար միջնորդ կազմակերպություններին կատարվող վճարումները, ինչը շուկայում մոտավորապես կազմում է ամսական 10.000-15.000 դրամ:

Հստակեցվել է լիզենզիայի տրման գործընթացը, էականորեն կրճատվել են լիցենզիայի տրման ժամկետները՝ նախկին 30 օրվա փոխարեն լիցենզիան կտրվի 5 աշխատանքային օրվա ընթացքում և տաքսի գործունեություն իրականացնողները կշփվեն միայն մեկ պետական մարմնի հետ:

Այսպիսով յուրաքանչյուր մեքենայի հաշվարկով տաքսի գործունեություն իրականացնողները կխնայեն ամսական 10.000-15.000 դրամ (բուժզննման, տեխզննման, հավաքակայանի, հարկային հաշվետվության ներկայացման պահանջների վերացում): Հաշվի առնելով, որ այսօր շուկայում առկա է մոտ 10.000 տաքսի՝ տարեկան խնայողությունը կկազմի շուրջ 1.5 մլրդ դրամ: