ՀԲԸ Միությունը 575 հազար դոլար կտրամադրի նոր երկարաժամկետ կրթական ծրագրի համար12 ապրիլի 2013 - 14:59 AMT PanARMENIAN.Net - Հայաստանի Ամերիկյան Համալսարանը (ՀԱՀ) և Հայկական Բարեգործական Ընդհանուր Միությունը (ՀԲԸՄ) մեկնարկում են նոր համատեղ ծրագիր աշխուժացնելու աշխատանքային շուկան Լեռնային Ղարաբաղի Հանրապետությունում, ասվում է ՀԲԸՄ հաղորդագության մեջ: ՀԲԸՄ-ն և ՀԱՀ-ն այս մասին հայտարարեցին ապրիլի 3-ին, Ստեփանակերտի թիվ 3 դպրոցում կազմակերպված հանդիսավոր արարողության ժամանակ, որին ներկա էին ԼՂՀ Ազգային Ժողովի նախագահ Աշոտ Ղուլյանը, ԼՂՀ վարչապետ Արա Հարությունյանը, այլ պաշտոնյաներ: Բացման հանդիսավոր արարողությունից հետո ՀԱՀ-ն այստեղ անցկացրեց բաց դռների օր` տեղի լայն հասարակությանը ներկայացնելով համալսարանի կրթական ծրագրերը, այդ թվում բակալավրի, մագիստրոսի և հատուկ դասընթացների ծրագրերը: Ստեփանակերտ այցելության օրերին ՀԱՀ և ՀԲԸՄ պատվիրակություներին ընդունեց ԼՂՀ նախագահ Բակո Սահակյանը, որը ԼՂՀ կրթական համակարգի զարգացման ջատագովներից է: «Մենք լիովին գիտակցում ենք, թե ինչ է բերում Հայաստանի ամերիկյան համալսարանը Ղարաբաղ և վստահեցնում եմ, որ մենք կաջակցենք Ձեզ բոլոր հնարավոր ուղղություններով՚, ասաց Նախագահ Սահակյանը: ՙԱվելին, մենք մեր երախտագիտությունը Ձեզ կհայտնենք, Ձեր աշխատանքի արդյունքում մեր ունեցած առաջընթացով: Հավատացած եմ, որ դա կլինի այս ծրագրի հաջողության լավագույն արտահայտումը»: Այս հավակնոտ նպատակին հասնելու համար առաջիկա հինգ տարիների ընթացքում ՀԲԸՄ-ն կտրամադրի 575,000 ԱՄՆ դոլար` աջակցելու ՀԱՀ Հատուկ դասընթացների բաժնի կողմից Ղարաբաղում իրականացվող այս Երկարաժամկետ Կրթական Ծրագրին (ԵԿԾ): Այն կառաջարկի անգլերեն լեզվի ուսուցման վեց մակարդակ, ինչպես նաև հավաստագիր շնորհող չորս տարբեր դասընթացներ` Ռազմավարական բիզնես կառավարում, Գործադիր առաջնորդություն, Հանրային քաղաքականության մշակում և կառավարում, Զբոսաշրջություն և հյուրասիրության կառավարում: «Կրթությունը տնտեսության աճը խթանելու լավագույն գործիքն է, և ՀԱՀ-ն ոգևորված է ՀԲԸՄ-ի հետ աշխատելու այս հնարավորությունից և ներկայացնելու այնպիսի մի ծրագիր, որը կբացի նոր կրթական հնարավորություններ, որոնք էլ իրենց հերթին կբերեն կրթական աստիճաններ և հաջողված կարիերաներ Ղարաբաղում, Հայաստանում և ողջ աշխարհում», ասաց ՀԱՀ նախագահ Բրյուս Պողոսյանը: «Այս ծրագրի միջոցով, ՀԱՀ Հատուկ դասընթացների բաժինը Ղարաբաղում կստեղծի բարձրորակ, երկարաժամկետ կրթական հնարավորություններ, որոնք կբացեն նոր դռներ, կքաջալերեն բարձրագույն կրթություն ստանալու անհրաժեշտությունը և կնպաստեն կայուն տնտեսական զարգացմանը՚: ՀԱՀ Հատուկ դասընթացների բաժինն իր դասերը կմեկնարկի Ստեփանակերտի թիվ 3 դպրոցում, մինչ ՀԲԸՄ-ն կկառուցի նոր մշակութային և կրթական համալիր այս և այլ ծրագրերի իրականացման համար: Նախագահ Սահակյանը նշեց, որ ՀԲԸՄ-ն մի կազմակերպություն է, որն անբաժանելի մասն է ԼՂՀ-ի և Միության` այս նոր նախաձեռնությամբ հանդես գալը բոլորովին զարմանալի չէ: «Այսօր սկիզբ է դրվում նոր ժամակաշրջանի: ՀԲԸՄ ԼՂՀ համալիրը, երբ արդեն պատրաստ լինի, նոր հնարավորություններ ու նոր հորիզոններ կբացի Արցախի ժողովրդի առջև և իր ներդրումը կունենա երկրի կայուն տնտեսական զարգացման գործում: Նոր համալիրը, 1988թ.-ից ի վեր Ղարաբաղին օգնելու և սատարելու ՀԲԸ Միության որդեգրած հստակ ու անշեղ ուղղու բնական շարունակությունն է»,- ասաց ՀԲԸՄ Կենտրոնական Վարչական Ժողովի անդամ Վազգեն Յակուբյանը: Շինարարության ավարտից հետո ՀԲԸՄ ԼՂՀ նոր համալիրը կառաջարկի երիտասարդների և մեծահասակների համար նախատեսված տարաբնույթ ծրագրեր, ներառյալ ստեղծարար արվեստների, հաղորդակցության, տեղեկատվական տեխնոլոգիաների ոլորտներում վերապատրաստման դասընթացներ: Դասերը հասանելի կլինեն թե ավագ դպրոցի և համալսարանների ուսանողներին, թե ձեռնարկատերերին ու կառավարության անդամներին: Ծրագիրը նաև կառաջարկի համալսարանի նախապատրաստական դասընթացներ, սեմինարներ կառավարման, հանրային հաղորդակցության և համակարգչային գիտելիքների ոլորտներում, ինչպես նաև գործնական քննարկումներ կարիերայի զարգացման, ինքնակենսագրական փաստաթղթերի լրացման և հարցազրույցների մասնակցության հմտությունների վերաբերյալ: Ուշագրավ
«Ամեն բնակչի կողքին 15 ոստիկան է կանգնած, անձնագրով են ներս թողնում միայն Կիրանցի բնակիչներին»,–ասել է վարչական ղեկավարը Որոշ դեպքերում անձանց ազատությունից զրկելիս չեն ներկայացվում նրանց ազատությունից զրկելու հիմքերն ու պատճառները Պահանջն առնչվում է նրա հետ փոխկապակցված 7 անձի Վարդանյանն ասել է, որ գտնվում է մեկուսացման խցում Ամենաընթերցվողը բաժնում | Ադրբեջանի մեջլիսում մտահոգ են այդ երկրի պաշտոնյաների դեմ ԱՄՆ հնարավոր պատժամիջոցների հեռանկարով Օրուջն ասել է, թե կարելի է «Փաշինյանին հրավիրել Բաքու, բայց փակել մուտքը երկիր պատժամիջոցների կողմնակիցների համար» ԱԳՆ․ ՀՀ-ն չի մասնակցի ՀԱՊԿ գործունեության ֆինանսավորմանը Ուշակովն ավելի վաղ ասել էր, որ Հայաստանը պատրաստվում է ձեռնպահ մնալ ՀԱՊԿ-ի ֆինանսավորումից Սյունիքի Շաքի գյուղի մոտ կկառուցվի մաքսային և լոգիստիկ կենտրոն Կենտրոնը հագեցված է լինելու լաբորատոր սարքավորումներով և պարագաներով, սկանավորման սարքերով ՀՀ-ն և ՎԶԵԲ-ը 236 մլն եվրոյի վարկային համաձայնագիր կստորագրեն Սիսիան-Քաջարան ճանապարհի մի հատվածը կառուցելու համար Կկառուցվի 5 թունել, 11 կամուրջ, 68 հեղեղատ, 43 հենապատ |