Դավթաշենում թունավորման նոր դեպքեր չկան. Համայնքում խմելու ջուրն աղտոտված էր

PanARMENIAN.Net - Առողջապահության նախարարության իրականացված բակային համայցերի արդյունքում այսօրվա դրությամբ Արագածոտնի մարզի Դավթաշեն համայնքում աղիքային խանգարման գանգատներով նոր անձինք չեն հայտնաբերվել: Նախորդ օրերին հայտնաբերված գանգատներ ունեցող բոլոր անձանց մոտ երևույթները հիմնականում տևել են մի քանի ժամ և առանց բուժական որևէ միջամտության անցել են: Հուլիսի 1-ի դրությամբ հայտնաբերված կլինիկական նշաններով 3 անձինք այլևս գանգատներ չեն նշում: «Թալինի» ԲԿ-ում հոսպիտալացված հիվանդը դուրս է գրվել առողջացումով: Հունիսի 28-30-ին վերցված խմելու ջրի նմուշների լաբորատոր հետազոտության արդյունքում հայտնաբերվել են ջրի որակի շեղումներ, որոնք վկայում են խմելու ջրի աղտոտման մասին:

Ներկայումս իրականացվում են բոլոր անհրաժեշտ միջոցառումները գյուղի բնակչությանը մատակարարվող խմելու ջրի անվտանգության ապահովման ուղղությամբ, այդ թվում` ջրի կանխարգելիչ վարակազերծում։ Այդ ամենի արդյունքում խմելու ջրի որակը համապատասխանեցվել է սանիտարահիգիենիկ նորմերի պահանջներին: ԱՆ-ից հայտնում են, որ աշխատանքները շարունակվում են: