Գորիսի միջադեպ. Սյունիքի նախկին մարզպետի որդու արյան մեջ թմրանյութ է հայտնաբերվել

PanARMENIAN.Net - Սյունիքի նախկին մարզպետ Սուրիկ Խաչատրյանի որդու` Տիգրան Խաչատրյանի արյան մեջ թմրանյութ է հայտնաբերվել. դատաբժշկական փորձաքննության արդյունքները պատրաստ են: PanARMENIAN.Net ի թղթակցի հետ զրույցում Բուդաղյանների շահերի պաշտպան Հայկ Ալումյանն ասաց. «Քանի որ լրատվամիջոցներն արդեն նման տեղեկություն են հրապարակել, ես նախաքննական գաղտնիք չեմ հրապարակում, այնպես որ, այո, հաստատում եմ` Տիգրան Խաչատրյանի արյան մեջ թմրանյութ է հայտնաբերվել»:

Հիշեցնենք, որ հունիսի 1-ին, ժամը 23.40-ին, անհայտ քաղաքացուց ոստիկանության Գորիսի բաժնում ահազանգ է ստացվել, որ Գետափնյա թաղամասից լսվել են կրակոցներ: Մեկնած օպերատիվ խումբը պարզել է, որ հունիսի 1-ին, երեկոյան, Դավիթ-Բեկի փողոցի թիվ 1 հասցեում գտնվող առանձնատան դիմացի հատվածում տեղի են ունեցել կրակոցներ, ինչի արդյունքում 1970 թ. ծնված Ավետիք Բուդաղյանը ստացած հրազենային վնասվածքներից տեղում մահացել է, իսկ 1971 թ. ծնված Արտակ Բուդաղյանը և 1975 թ. ծնված Նիկոլայ Աբրահամյանը հրազենային վնասվածքներով տեղափոխվել են հիվանդանոց:

ՀՀ քրեական օրենսգրքի 104-րդ հոդվածի 2-րդ մասի 6-րդ կետի և 235-րդ հոդվածի 1-ին մասով հանցագործություններ կատարելու կասկածանքով հունիսի 2-ին եւ 3-ին ձերբակալվել են Գորիս քաղաքի բնակիչներ` Զարզանդ Արտաշեսի Նիկողոսյանը և Տիգրան Սուրիկի Խաչատրյանը: