ՄԱԿ ԱԽ ներկայացված բանաձևի նախագիծը Սիրիայի վերաբերյալ ամենևին չի մտահոգում Բաշար Ասադին

PanARMENIAN.Net - Սիրիայի նախագահը չինական հեռուստատեսությանը տված հարցազրույցում հայտարարել է, որ նա բացարձակապես չի մտահոգվում ԱՄՆ, Մեծ Բրիտանիայի ու Ֆրանսիայի մշակած բանաձևի նախագծի վերաբերյալ, որը ներկայացվել է ՄԱԿ ԱԽ, հայտնում է «ՌԻԱ Նովսոստին» Reuters գործակալության վրա հղումով:

Ասադը հայտարարել է, որ «ԱՄՆ-ն, Ֆրանսիան ու Մեծ Բրիտանիան ուղղակի փորձում են հաղթող դուրս գալ Սիրիայի դեմ պատերազմում, որը նրանց պատկերացմամբ թշնամի է»: Նա նշել է նաև, որ «Ռուսաստանն ու Չինաստանը դրական դեր են կատարում ՄԱԿ ԱԽ-ում՝ երաշխավորելով, որ Սիրիայի դեմ ռազմական գործողություն սկսելու ոչ մի պատրվակ չի ստանա Խորհրդի հավանությունը»:

Անցած շաբաթվա սկզբին ԱՄՆ-ն, Մեծ Բրիտանիան ու Ֆրանսիան ՄԱԿ ԱԽ 5 մշտական անդամներին ներկայացրեցին Սիրիայի գծով բանաձևի նախագիծը: Ավելի ուշ ԱՄՆ նախագահի խորհրդականի տեղակալ Բեն Ռոդսը հայտարարեց, որ ԱՄՆ-ն պայքարելու է, որպեսզի Սիրիայի վերաբերյալ բանաձևը կազմված լինի ըստ ՄԱԿ կանոնադրության 7-րդ հոդվածի, որը թույլ է տալիս ուժի կիրառում, որին բացահայտորեն դեմ է Ռուսաստանը:

Մինչդեռ, ինչպես հայտնում է ԻՏԱՐ-ՏԱՍՍ-ը, ՌԴ ԱԳՆ ղեկավար Սերգեյ Լավրովը ՀԱՊԿ ԱԳՆԽ, ՊՆ նախարարների խորհրդի և ՀԱՊԿ անդամ երկրների ԱԽ քարտուղարների կոմիտեների համատեղ նիստում հայտարարեց, որ Ռուսաստանը կոչ է անում ՀԱՊԿ երկրներին սատարել Սիրիայի հարցում միջազգային հանրությանը:

«Մենք մտահոգված ենք Սիրիայի իրավիճակով, և ոչ միայն ողջ տարածաշրջանի համար բացասական հետևանքների լույսի ներքո, այլ նաև բացասական հետևանքների առումով միջազգային իրավունքի ողջ համակարգի համար»,-ասել է Լավրովը:

«Դուք գիտեք, որ հարկավոր է արագ լուծել երկխոսություն սկսելու հարցը, լուծել քիմիական զենքի հարցը»,-ասել է նախարարը: «Կարծում եմ, այսօր մենք կարող ենք սատարել Սիրիայի գծով միջազգային հանրության ջանքերին»,-ասել է նա:

Մինչ այդ Բաշար Ասադը հայտարարել է, որ Սիրիայի քիմիական զենքի պաշարների ոչնչացման համար 1 մլրդ դոլար կպահանջվի և 1 տարի: Գերմանիան արդեն պատրաստակամություն է հայտնել տեխնիկական և նյութական աջակցություն տրամադրել: Մինչ այդ Մոսկվան առաջարկեց Դամասկոսին քիմիական զենքի հանդեպ միջազգային հսկողություն սահմանել, ինչին Սիրիան արդեն համաձայնվել է: Սեպտեմբերի 14-ին Ռուսաստանն ու ԱՄՆ-ն համաձայնեցրին քիմիական զենքի հանդեպ հսկողություն սահմանելու հարցը: Սեպտեմբերի 20-ին Սիրիայի կառավարությունն իր քիմիական զենքի մասին տվյալներն ուղարկել է Հաագա, որտեղ գտնվում է Քիմիական զենքի արգելման կազմակերպության կենտրոնակայանը: Սիրիայում արդեն 2 տարի է քաղաքացիական պատերազմ է: Այդ ընթացքում, ՄԱԿ տվյալներով, ավելի քան 100 հազար մարդ զոհվել է, 2 մլն՝ դարձել փախստական, ևս 4 մլն՝ ներքին տեղահանված անձինք են:

Սոչիում ընթանում է ՀԱՊԿ անդամ երկրների ղեկավարնեի հանդիպումը, ինչպես նաև ԱԳՆԽ, ՊՆ նախարարների խորհրդի և ՀԱՊԿ անդամ երկրների ԱԽ քարտուղարների կոմիտեների համատեղ նիստը: Արդեն հավանության արժանացած փաստաթղթերը կներկայացվեն նախագահների ստորագրմանը:

Հավաքական անվտանգության խորհրդի (ՀԱԽ) կազմում են ՀԱՊԿ անդամ պետությունների՝ Հայաստանի, Բելառուսի, Ղազախստանի, Ղրղզստանի, Ռուսաստանի ու Տաջիկստանի նախագահները: ՀԱՊԿ ՀԱԽ նախագահը 2013 թվականին Ղրղզստանի նախագահ Ալմազբեկ Ատամբաևն է:

ՀԱՊԿ նստաշրջանին մասնակցելու նպատակով Սոչի են մեկնել ՀՀ նախագահ Սերժ Սարգսյանն ու ՀՀ ԱԳՆ ղեկավար Էդվարդ Նալբանդյանը: