Մոսկվայում ադրբեջանական համայնքի մենաշնորհը հանգեցնում է արհեստական գնաճի

21 հոկտեմբերի 2013 - 12:48 AMT

PanARMENIAN.Net - Մոսկվայի ազգայնականները բացատրում են իրենց հակակրանքի պատճառները ադրբեջանցի ներգաղթյալների հանդեպ նրանով, որ նրանց վերահսկողության տակ են հայտնվել մայրաքաղաքի բանջարեղենի բազաները և գյուղմթերքի ներկրումը ՌԴ, այլ ոչ թե ազգային պատկանելությամբ:

Ռուս սափրագլուխները դեմ են, որ ներգաղթյալներն այդքան մեծաքանակ լինեն, ասել է ANS հեռուստաալիքով Բիրյուլովոյում անկարգությունների ժամանակ ազգայնական խմբավորումների ղեկավար Ալեքսանդր Բելովը:

Ըստ նրա, Մոսկվայում ադրբեջանական համայնքի մենաշնորհը հանգեցնում է արհեստական գնաճի: «Այս վիճակը ոչ ոքի ձեռք չի տալիս, բայց պայքարել օրինական ուղիներով չի ստացվում, քանի որ ադրբեջանական համայնքը չունի օրինական մենաշնորհային կազմակերպություն»,-ասել է նա:

Իր հերթին ՌԴ ԱԳ փոխնախարար Գրիգորի Կարասինը սխալ է համարում աժիոտաժը կատարվածի շուրջ: Ըստ նրա, ազգայնամոլությունը Ռուսաստանի պես բազմազգ երկրում անթույլատրելի է:

Պետդումայի պատգամավոր Ալեքսեյ Միտրոֆանովն ասել է, որ վերջին իրադարձությունները ցույց տվեցին երկխոսության պակասը երկու երկրների միջև:

Հոկտեմբերի 13-ին մոսկովյան Արևմտյան Բիրյուլովո թաղամասում անկարգությունների առիթ էր դարձել հոկտեմբերի լույս 10-ի գիշերը տեղի բնակիչ 25-ամյա Եգոր Շչերբակովի սպանությունը: Սկզբում որպես «ժողովրդական հավաք» կազմակերպված ցույցը վերածվել էր անկարգությունների:Բերման է ենթարկվել 400 մարդ: Երեքշաբթի պարզվեց այդ գործով կասկածյալ Օրհան Զեյնալովի անձը:

Ձերբակալության ժամանակ Զեյնալովը դիմադրել է: Ավելի ուշ, օպերատիվ աշխատակիցների հետ զրույցում նա խոստովանել էր իր մեղքը՝ ասելով, թե ինքն է դանակով հարվածել Եգոր Շչերբակովին:

ՌԴ իրավապահ մարմինները հայտարարել են, որ Զեյնալովը չունի ՌԴ քաղաքացիություն: Ըստ ՌԴ ՔԿ տվյալների, կասկածյալը մոտ 10 տարի է բնակվում է Մոսկվայում, սակայն բնակության մշտական վայր չունի, չարաշահում է ալկոհոլային խմիչքները, բռնկուն է, ագրեսիվ, մշտական աշխատանք չունի:

Ավելի ուշ Զեյնալովը հրաժարվել է խոստովանական ցուցմունքներից:

Հղումներ թեմայով.

http://newsazerbaijan.ru