Ուկրաինային առաջին փոխվարչապետ. Կիևը շուտով կստորագրի ԵՄ հետ համաձայնագիրը

13 դեկտեմբերի 2013 - 11:56 AMT

PanARMENIAN.Net - Ուկրաինայի առաջին փոխվարչապետ Սերգեյ ԱրբուզովնԵՄ ընդլայնման գծով եվրահանձնակատար Շտեֆան Ֆյուլեի հետ բանակցություններից հետո հայտարարել է, որ Ուկրաինան շուտով կստորագրի ԵՄ հետ ասոցացման համաձայնագիրը:

Ըստ Արբուզովի, համաձայնագիրը կստորագրվի, հաշվի առնելով ազգային ռազմավարական շահերը, և Ուկրաինան ունի այդ քաղաքական կամքը:

Փոխվարչապետ Սերգեյ Արբուզովը նշել է նաև, որ կողմերը պայմանավորվել են ասոցացման համաձայնագրի կիրառման համար ճանապարհային քարտեզ նախապատրաստել:

Ֆյուլեն իր հերթին խոստացել է աջակցել Ուկրաինային ԱՄՀ հետ պայմանավորվածության հասնելու համար անհրաժեշտ պայմանների ստեղծման և առևտրի ազատ գոտուն միանալու համար: «Հստակ հաղորդեցինք մեր ուկրաինացի գործընկերներին, որ ԵՄ-ն արդիականացման տեսակետից Ուկրաինայի ապագայի խոշորագույն դոնորն է»,- ասել է եվրահանձնակատարը: Վարչապետ Նիկոլայ Ազարովը հայտարարել է, որ հարկավոր է հետաձգել ԵՄ հետ առևտրի ազատ գոտու մասին համաձայնագրի որոշ նորմերը ուժի մեջ մտնելու ժամկետը:

«Եկեք պայմանավորվենք: Չենք փոխի համաձայնագիրն, այլ կփոխենք իրականացման պայմանները, եկեք այնպես գրենք, որ մեզ համար շահավետ լինի»,- ասել է վարչապետն ագրոբիզնեսի ներկայացուցիչների հետ հանդիպմանը:

Հինգշաբթի Եվրախորհրդարանը համերաշխություն է հայտնել Ուկրաինային քաղաքացիական անհնազանդության ակցիաների մասնակիցների հետ հատուկ բանաձև ընդունելով:

Պատգամավորները ողջունել են Եվրախորհրդարանի նիստում փաստաթղթի ընդունումը, պարզելով Ուկրաինայի ու Եվրամիության դրոշները:

Եվրախորհրդարանը նաև ափսոսում էր, որ Ուկրաինայի նախագահ Վիկտոր Յանուկովիչն որոշել էր չստորագրել համաձայնագիրը Վիլնյուսում, անվանելով այդ քայլը «բաց թողնված հնարավորություն ԵՄ-Ուկրաինա հարաբերություններում Ուկրաինայի ձգտումների համար»:

Եվրախորհրդարանականները նշեցին նաև, որ եվրոպական հանրությանը միանալու մասին են վկայում ցույցերն ու հանրահավաքները Կիևի Եվրամայդանում: Բանաձևով նաև դատապարտվեցին ոստիկանության կոշտ գործողությունները:

«Այդ իրադարձությունները կարող են էլ ավելի լարել իրավիճակն առանց այդ էլ բարդ իրավիճակում»,- ասվում է փաստաթղթում:

Պատգամավորները հորդորել էին Ուկրաինայի իշխանություններին բանակցել ցուցարարների հետ ու անհապաղ ազատ արձակել ակցիայի ձերբակալված մասնակիցներին:

«Ցանկացած ժողովրդավարական հանրության մեջ նոր ընտրություններ կարելի է անցկացնել, երբ կրկին առաջանում է օրինականությունը հաստատելու պահանջ»,- ասվում է բանաձևում:

Հղումներ թեմայով.

http://bbc.co.uk