Հայաստանը տնտեսական ազատությամբ 41-րդ երկիրն է աշխարհում. կոռուպցիան դեռ հաղթահարված չէ

14 հունվարի 2014 - 16:50 AMT

PanARMENIAN.Net - Հայաստանը 41-րդն է աշխարհի 178 երկրներից Տնտեսական ազատության ցուցիչ 2014-ի տվյալներով և աշխարհում ու եվրոպական տարածաշրջանում միջինից բարձր մակարդակ ունի` ցույց է տվել Ամերիկյան Heritage Foundation հիմնադրամի տարեկան զեկույցը:

Գնահատելով Հայաստանի կառավարության` տնտեսությունը ազատականացնելու գործողությունները` զեկույցի փորձագետները կարևորել են, որ անցած 20 տարիներին երկիրը բարելավել է տնտեսական ազատության ցուցանիշը 26,7 միավորով, ինչը չորրորդ ամենամեծ բարձրացումն է: Առաջխաղացմանը նպաստել են տնտեսական 10 ազատություններից 8-ի դեպքում արձանագրված դրական տեղաշարժերը, օրինակ, հարկաբյուջետային, առևտրի, ֆինանսական, պետական ֆինանսական միջոցների կառավարման բնագավառներում:

«Տնտեսական ազատության լայնամասշտաբ առաջխաղացման շնորհիվ տնտեսությունում արձանագրված դիվերսիֆիկացումը նպաստել է Հայաստանի տնտեսական դինամիզմի բարելավմանն ու աղքատության կրճատմանը»,- եզրակացնում են զեկույցի փորձագետները:

Ազգային վիճակագրության ծառայության տվյալներով` ըստ եկամտի հաշվարկվող աղքատության մակարդակը 2008 թվականի 38,1 տոկոսից 2012-ին նվազել է մինչեւ 32,8 տոկոս:

Հարևան երկրներից Հայաստանը զիջում է միայն Վրաստանին, որը 178 երկրներից 22-րդն է որպես «հիմնականում ազատ» երկիր, Թուրքիան` 64-րդը և Ադրբեջանը` 81-րդը, Հայաստանի նման «չափավոր ազատ» տնտեսություն ունեն, մինչդեռ Իրանի տնտեսությունը, որ 173-րդն է, համարվում է «ճնշված»:

Այնուամենայինվ, անցած տարվա համեմատ, Հայաստանը հետընթաց է գրանցել 0,5 կետով` մինչև 68,9 միավոր, ինչն, ըստ զեկույցի, պայմանավորված է ներդրումային, գործարարության և դրամական ազատության ոլորտներում գրանցված անկմամբ: Պաշտոնական վիճակագրության համաձայն` ներդրումների ծավալը վերջին 5 տարիներին Հայաստանում աստիճանաբար նվազել է` ՀՆԱ-ում 2008-ին արձանագրված 41 տոկոսից 2012-ին դառնալով 23,8 տոկոս ու պահպանելով նվազման տեմպը նաև անցած տարի:

Ըստ զեկույցի հեղինակների` հետընթացը հաղթահարելուց զատ, Հայաստանը նաև պետք է «էական մարտահրավերներ» հաղթահարի` ինստիտուցիոնալ և համակարգային խորը բարեփոխումներ իրականացնելով, քանի որ թե սեփականության պաշտպանության իրավունքը, թե կոռուպցիայի մակարդակը չեն համապատասխանում համաշխարհային չափանիշներին:

«Կոռուպցիան վարակում է այնպիսի կարևորագույն ոլորտներ, ինչպիսիք են հարկային ու մաքսային գործառնությունները, առողջապահությունը, կրթությունն ու օրենքի կիրառումը»,- եզրակացնում են զեկույցի հեղինակները, որոնք «ազատություն կոռուպցիայից» ցուցանիշը ամենացածրերից մեկն են գնահատել 26,7 միավոր:

Տնտեսական ազատության ցուցիչը հաշվարկվում է տասը ցուցանիշների հիման վրա` գործարարության, առևտրի, հարկաբյուջետային, դրամավարկային, ներդրումների, ֆինանսական, աշխատանքի ազատությունները, կառավարության ծախսերը, կոռուպցիայից ձերբազատվածությունն ու սեփականության իրավունքի պաշտպանության մակարդակը։ Ցուցանիշներից յուրաքանչյուրը գնահատվում է 0-ից մինչև 100 միավորով:

Հղումներ թեմայով.

http://www.heritage.org

Ուշագրավ

Ըստ ԿԲ-ի՝ Արցախի կուտակային կենսաթոշակային համակարգի գումարներն ապահով ակտիվներում են

Ըստ ֆինանսների նախարարության՝ միջպետական վարկի մնացորդն ուղղվելու է բռնի տեղահանված անձանց աջակցությանը

Խաղողի 65,000 տ ավելցուկ կա. Մթերող ընկերությունները կսուբսիդավորվեն

Կապահովվի խաղողի մթերումների գործընթացի կազմակերպումը

ԵԱԶԲ–ն չի բացառել՝ ՀՀ տնտեսական աճը տարեվերջին կարող է գերազանցել 7․5%-ը

Բանկի զեկույցում նշվում է, որ Հայաստանի տնտեսական ակտիվությունն ավելացել է 10․4 տոկոսով հունվար–օգոստոսին

ԿԲ. Տեղահանված արցախցիների վարկերի մասով անհատական կամ ընդհանուր լուծումներ կառաջարկվեն

Տարհանված քաղաքացիների ֆինանսական սպասարկման հետ կապված կարող են խնդիրներ առաջանալ հիմնականում գրավադրված գույքի (ոսկով գրավադրված վարկերի) ֆիզիկական առկայության մասով