ՄԹ պետնախարար. Շփման գծում կորուստները մտահոգիչ են 3 նոյեմբերի 2014 - 13:04 AMT PanARMENIAN.Net - Արտգործնախարար Էդվարդ Նալբանդյանը նոյեմբերի 3-ին հանդիպել է Երևան ժամանած Մեծ Բրիտանիայի Եվրոպայի հարցերով պետական նախարար Դևիդ Լիդինգթոնին։ «Հայաստանը կարևորում է Միացյալ Թագավորության հետ երկկողմ և բազմակողմ ձևաչափերով հարաբերությունների զարգացումը: Գոհունակությամբ պետք է նշեմ, որ վերջին տարիներին ականատես ենք քաղաքական շփումների ակտիվացման, և վստահ եմ, որ այդ միտումը կլինի շարունակական»,- ողջունելով հյուրին` ասել է Նալբանդյանը: Նախարար Լիդինգթոնն էլ նշել է, թե Միացյալ Թագավորությունը Հայաստանը դիտարկում է որպես կարևոր գործընկեր, ու իր այցելության նպատակը և ուղերձը ՀՀ հետ գործակցությանը նոր թափ հաղորդելն է:Բանակցություններին քննարկվել են քաղաքական, առևտրատնտեսական և այլ ոլորտներում գործակցության խորացման ուղիները։ Այս համատեքստում Էդվարդ Նալբանդյանը նշել է, որ վերջին շրջանում նկատելի է բրիտանական բիզնեսի հետաքրքրության աճը Հայաստանի հետ առևտրատնտեսական կապերը զարգացնելու հարցում: Զրուցակիցները համակարծիք էին, որ հարաբերությունների զարգացման համար կարևոր դեր ունի իրավական դաշտի կատարելագործումն ու ամրապնդումը, ինչպես նաև արդեն ստորագրված մեկ տասնյակից ավելի փաստաթղթերի արդյունավետ կիրառումը: Նախարար Նալբանդյանը Դևիդ Լիդինգթոնին հանգամանալից ներկայացրել է Հայաստանի և ԵԱՀԿ Մինսկի խմբի համանախագահ երկրների ջանքերը՝ ուղղված Լեռնային Ղարաբաղի հիմնահարցի խաղաղ կարգավորմանը, Փարիզում մեկ շաբաթ առաջ կայացած գագաթաժողովի արդյունքները: Այս առումով ՄԹ Եվրոպայի հարցերով նախարարը նշել է, որ Մեծ Բրիտանիան սատարում է հակամարտության կարգավորման ուղղությամբ Մինսկի խմբի համանախագահության հովանու ներքո ընթացող գործընթացը։ Փարիզի Մարինյի պալատում հոկտեմբերի 27-ի երեկոյան տեղի են ունեցել Ֆրանսիայի նախագահ Ֆրանսուա Օլանդի նախաձեռնությամբ ԼՂ հիմնահարցի կարգավորմանն ուղղված բանակցությունները: Ֆրանսիայի նախագահի հետ առանձնազրույցներից հետո Հայաստանի և Ադրբեջանի նախագահները բանակցություններ են վարել ԵԱՀԿ Մինսկի խմբի համանախագահների և ԵԱՀԿ գործող նախագահի անձնական ներկայացուցիչ Անջեյ Կասպրշիկի մասնակցությամբ, ապա առանձնազրույց ունեցել: Բանակցությունների արդյունքներն ուշ երեկոյան ամփոփվել են նախագահներ Ֆրանսուա Օլանդի, Սերժ Սարգսյանի, Իլհամ Ալիևի և ԵԱՀԿ Մինսկի խմբի համանախագահներ Իգոր Պոպովի (Ռուսաստան), Ջեյմս Ուորլիքի (ԱՄՆ), Պիեռ Անդիոյի (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշիկի համատեղ հանդիպմանը: Խաղաղ բանակցություններում առաջընթաց արձանագրելու համար հանդիպման մասնակիցները կարևորել են ԵԱՀԿ Մինսկի խմբի համանախագահության շրջանակում երկխոսության շարունակումը և վստահության ամրապնդման ուղղությամբ ջանքերը: Ընդգծվել է հակամարտության խաղաղ կարգավորման այլընտրանքի բացակայությունը: Պայմանավորվել են շարունակել բարձր մակարդակի բանակցությունները: Ավելի ուշ ԱԳ նախարար Էդվարդ Նալբանդյանը եռակողմ հանդիպումը որակել է օգտակար և կառուցողական՝ նշելով, որ ևս մի փոքր քայլ արվեց՝ ավելի մոտեցնելու կողմերի դիրքորոշումը: Բանակցությունների օրակարգում էին միջազգային և տարածաշրջանային օրակարգի մի շարք հարցեր, մասնավորապես, Սիրիայում և Իրաքում և, ընդհանրապես, Մերձավոր Արևելքում ընթացող զարգացումները, Իրանի միջուկային ծրագրի շուրջ բանակցային գործընթացը: Հանդիպմանը հետևել է համատեղ մամուլի ասուլիս: «Մենք մշտապես ընդգծում ենք, որ ինքնորոշման իրավունքի իրագործումը չի կարող կոնֆլիկտների պատճառ լինել, այլ հակառակը: Ինքնորոշման իրավունքի իրականցման խոչընդոտումը հիմք է ստեղծում կոնֆլիկտների համար: Դրա մասին է խոսում այդ զեկույցը»,- ասուլիսին ասել է Նալբանդյանը՝ պատասխանելով ՄԱԿ-ի փորձագիտական զեկույցի վերաբերյալ հարցին, որի եզրակացության մեջ նշված է, որ շատ հակամարտությունների լուծման անհնար է հասնել անտեսելով ինքնորոշման իրավունքի իրագործումը: Նախարար Նալբանդյանի խոսքը մեջբերելով՝ Panorama.am-ը գրում է, որ Հայաստանը մշտապես նշել է՝ ինքնորոշման իրավունքի իրագործումը կարող է կանխարգելել հակամարտությունները, նպատել միջազգային խաղաղության ամրապնդմանը: «Ասել ենք, որ ինքնորոշման իրավունի իրագործումը կարող է նպաստել ժողովրդավարության ամրապնդմանը, մարդու իրավունքների պաշտպանությանը: Դրա մասին է խոսում այդ զեկույցը»,- ասել է նա: Դեմ դուրս գալ կամ անտեսել ինքնորոշման իրավունքը, ըստ նախարարի, նույնն է, ինչ հակադրվել էվոլուցիային: «Միանշանակ կարող եմ ասել, որ այն կարևոր, արժեքավոր զեկույցը է, ևս մեկ անգամ հաստատում է այն մոտեցումները, որ Հայաստանը, բազմաթիվ երկրներ ունեցել և ունեն այդ հարցի վերաբերյալ: Չի կարող մի երկիր, որտեղ պաշտպանվում են մարդու իրավունքները, ժողովրդավարությունը, դուրս գալ ինքնորոշման դեմ: Մերժել ինքնորոշման իրավունքը՝ նոր խնդիրների, հիմնախնդիրների, նոր հակամարտությունների պատճառ կարող է լինել»,- ասել է Հայաստանի արտաքին գործերի նախարարը: Միևնույն ժամանակ Միացյալ Թագավորության Եվրոպայի հարցերով պետական նախարար Դևիդ Լիդինգթոնը նշել է, թե վերջին տարվա ընթացքում շփման գծում մարդկային կյանքերի կորուստը մտահոգիչ է: Այնուհետև Լիդինգթոնը շեշտել է, թե միջազգային հանրությունը պետք է կրկնակի աջակցություն ցուցաբերի Մինսկի խմբի համանախագահներին հակամարտության խաղաղ կարգավորման և մարդկային ողբերգությունների կանխման հարցում: Հարցին՝ արդյոք Միացյալ Թագավորությանը չեն խանգարում Ադրբեջանի հետ տնտեսական կապերը Ադրբեջանում մարդու իրավունքների վերաբերյալ իրավիճակին կոշտ գնահատական տալ, նա պատասխանել է. «Մենք բաց ենք այդ հարցում: Ես բաց խոսել եմ վերջին տարվա ադրբեջանական իրադարձությունների մասին: Պառլամենտի անդամները ևս իրենց մտահոգություններն են հայտնել, ԱԳՆ-ն տարեկան զեկույց է պատրաստում աշխարհում մարդու իրավունքների վիճակի մասին»,- մեջբերում է «Առավոտը»: Նա շեշտել է՝ կան տնտեսական շահեր, հատկապես կասպյան գազի շրջանակներում, բայց նաև հավաստիացրել՝ կան խնդիրներ, որոնք մտահոգության առիթ են՝ Ղարաբաղյան հակամարտությունը, Վրաստանի սառեցված հակամարտությունը: Լիդինգթոնն անդրադարձել է նաև Հայ-թուրքական արձանագրություններին՝ նշելով, որ առաջ շարժելու ճանապարհ է երևում: Նրա խոսքով, Անգլիան համարում է, որ հայ-թուրքական արձանագրությունները պետք է կյանքի կոչվեն: «Երկու կողմն էլ շատ բան ունի շահելու»,- ասել նա: Հղումներ թեմայով. Հայ-թուրքական հարաբերությունների կարգավորման մասին Արձանագրություններ Հայ-թուրքական հարաբերությունների կարգավորման մասին Արձանագրությունները ստորագրվել են 2009թ. հոկտեմբերի 10-ին Ցյուրիխում: Արձանագրությունները ստորագրել են Հայաստանի եւ Թուրքիայի ԱԳ նախարարներ Էդվարդ Նալբանդյանը եւ Ահմեդ Դավութօղլուն` Ֆրանսիայի, ԱՄՆ-ի, ՌԴ-ի եւ Շվեյցարիայի ԱԳՆ ղեկավարների ներկայությամբ: Շվեյցարիան որպես միջնորդ է հանդես գալիս հայ-թուրքական բանակցություններում 2007թ. ի վեր: Ըստ փաստաթղթերի, երկրների միջեւ պետք է հաստատվեն դիվանագիտական հարաբերություններ եւ պետք է բացվի 1993թ. ի վեր փակ հայ-թուրքական սահմանը: Հունվարի 12-ին Հայաստանի Սահմանադրական դատարանն Արձանագրությունները Հայաստանի Սահմանադրությանը համապատասխան ճանաչեց: ՍԴ որոշման մեջ Արձանագրությունների վերաբերյալ ոչ մի նախապայմաններ չկան, քանի որ դա հակասում է վճռի կայացման սահմանված կանոնին: ՍԴ որոշման համաձայն Հայ-թուրքական արձանագրությունները համապատասխանում են ՀՀ Սահմանադրությանն ու Հայաստանի Անկախության մասին հռչակագրին: Ուշագրավ Նա հավելել է, որ սահմանազատումն ու սահամանգծումը պետք է իրականցվեն համապատասխան սկզբունքներով Նա հավելել է, որ որևէ երկիր չի կարող վիճարկել որևէ այլ երկրի մարտունակ բանակ ունենալու իրավունքը Նա նաև ասել է, որ Հայաստանի և Վրաստանի միջև սահմանազատման աշխատանքները վերսկսելու պայմանավորվածություն կա
Նրա գնահատմամբ՝ մտահոգիչ է նաև հատվածական սահմազատում և սահմանագծում իրականացնելը Ամենաընթերցվողը բաժնում | Զախարովա․ ՀՀ-ն շարունակում է ՀԱՊԿ լիարժեք անդամ մնալ իր համապատասխան պարտավորություններով Նա նաև ասել է, որ ՌԴ–ն կասկածի տակ չի դնում իր արտաքին քաղաքական կուրսն ընտրելու ՀՀ սուվերեն իրավունքը Կուպմանը Բաքվում ասել է, որ Եվրահանձնաժողովը ողջունում է ՀՀ-ի և Ադրբեջանի միջև վերջին պայմանավորվածությունները Նա ասել է, որ Եվրահանձնաժողովում դրական են գնահատում Հարավային Կովկասում վերջին իրադարձությունները ԱՄՆ–ն պատժամիջոցներ է սահմանել որոշ թուրքական և ադրբեջանական ընկերությունների դեմ՝ ՌԴ–ին աջակցելու համար Պատժամիջոցներն առնչվում են այն ընկերություններին և ֆիզիկական անձանց, որոնք օգնում են Մոսկվային ռազմական բաղադրիչներ ստանալ Էրդողան․ Թուրքիան որոշել է խզել առևտրային կապերն Իսրայելի հետ Առևտրաշրջանառությունը երկրների միջև հասնում է 9․5 մլրդ դոլարի |