Ոռոգման ջուրը մայիսին կմատակարարվի անհատույց

PanARMENIAN.Net - Քանի որ ՀՀ որոշ տարածաշրջաններում վեգետացիայից առաջ անհրաժեշտ է խոնավալիցք հաղորդել և իրականացնել աղակալած հողերի լվացում, գյուղացիական տնտեսություններին աջակցելու նպատակով կառավարությունն այսօր՝ ապրիլի 30-ի նիստում ընդունել է որոշում, որը հնարավորություն կտա ջրօգտագործողների 80 հազար հա հողատարածություններին ոռոգման ջուրը մատակարարել անհատույց:

ՀՀ ՏԿ և ԱԻՆ հիդրոմետ ծառայության տվյալներով գետերի ջրահավաք ավազաններում առկա է բավական հաստ ձնաշերտ, ինչպես նաև հավանական է, որ գարնանը լինեն առատ տեղումներ և վարարումներ:

Վարչապետ Հովիկ Աբրահամյանի խոսքով հարցը քննարկվել է ՀՀ նախագահի, գյուղատնտեսության նախարարության, ջրային տնտեսության պետական կոմիտեի հետ: Որոշվել է մայիս ամսվա ընթացքում գետերի վարարման հետևանքով հեղեղումը կանխելու նպատակով «Սևան-Հրազդանյան-ջրառ» և «Ախուրյան-Արաքս-ջրառ» ՓԲԸ-ներին թույլատրել ջուրը մատակարարել առանց հասույթ ձևավորելու, ինչը կարևորագույն աջակցություն է հողօգտագործողներին: Վարչապետը ջրտնտպետկոմին հանձնարարել է մեծ պատասխանատվություն ցուցաբերել և հետևել միջոցառման արդյունավետությանը:

2014-ի դեկտեմբերին տարեվերջյան ասուլիսին գյուղնախարար Սերգո Երիցյանը որպես գյուղատնտեսության ոլորտի գլխավոր խնդիրներից մեկը նշել էր ոռոգման համակարգը՝ հավելելով, որ 2014-ին սակավաջրության պատճառով գյուղոլորտում լուրջ խնդիրներ առաջացան, ուստի դրա համար ժամանակ է անցնել կաթիլային ոռոգման համակարգերի ներդրմանը:

Նա նշեց նաև, որ անհրաժեշտ է գյուղացիական տնտեսություններին տալ նպատակային վարկեր՝ ցածր տոկոսադրույքով, որպեսզի իրենք հնարավորություն ունենան տնտեսություններում տեղադրել կաթիլային համակարգերը: «Այսօր բոլոր երկրներում ջրային ռեսուրսների պակաս կա: Մենք ևս ստիպված ենք մեր երկրում այդ խնդրին լուծում տալ»,- ասել է գյուղատնտեսության նախարարը: