Հունիսի 27-ին Արցախի Ամարասի վանքի հարակից տարածքում առաջին անգամ Թթի փառատոն կկազմակերպվի: Նախաձեռնողները ԼՂՀ ԿԱ Զբոսաշրջության և պատմական միջավայրի պահպանության վարչությունն ու «Արենի փառատոն» հիմնադրամն են:
Փառատոնը կներկայացնի տարածաշրջանում թթի մշակման, դրանից օղի թորելու և մետաքսագործության ավանդույթները։ Արցախի 7 շրջանի ու Հայաստանի տաղավարներում կներկայացվեն թթից ստացված բարիքները` օղին, դոշաբը, չամիչն ու մուրաբան:
PanARMENIAN.Net-ի հետ զրույցում «Արենի փառատոն» հիմնադրամի տնօրեն Նունե Մանուկյաննասաց, որ փառատոնի անցկացման վայրը հարուստ է թթի այգիներով: Այստեղ նախկինում աճեցվել են բոժոժներ, որոնցից էլ մետաքս են ստացել: Այստեղով է անցել Մետաքսի մեծ ճանապարհը:
Մանուկյանը նաև նշեց, որ միջոցառումը կոչված է խթանելու փառատոնային զբոսաշրջությունը, ներկայացնելու Արցախի խոհանոցը, պատմությունն ու մշակույթը, նպաստելու Արցախի, որպես անվտանգ երկրի ընկալումը զբոսաշրջիկների կողմից:
«Մասնակիցների հոսքն ապահովելու համար մշակվել են փաթեթներ, որոնք բաժանվել են տուրօպերատորներին։ Դրանցով առաջարկվում է մասնակցել փառատոնին` մեկ և երկու գիշերակացով արշավների ծրագրով»,- ասաց «Արենի փառատոն» հիմնադրամի տնօրենը:
Փառատոնի տարածքում կազմակերպվելու է արվեստի և ձեռքի աշխատանքի տաղավար, որտեղ այցելուները կծանոթանան արցախցի տաղանդավոր նկարիչների, վարպետների, կավագործների աշխատանքներին:
