Պետդեպ. Ռուսաստանի ՊՆ ցուցադրած նավթով բեռնատարները Թուրքիա չէին գնում

5 դեկտեմբերի 2015 - 11:35 AMT

PanARMENIAN.Net - ԱՄՆ-ն գտնում է, որ ՌԴ պաշտպանության նախարարության ներկայացրած լուսանկարները, որոնց վրա երևում են «Իսլամական պետության» նավթով հարյուրավոր բեռնատարներ, իրական են, սակայն կարծում են, որ ավտոշարասյունը ոչ թե Թուրքիա էր ուղևորվում, այլ Սիրիայի մյուս շրջաններ: Այս մասին լրագրողներին է ասել ԱՄՆ Պետդեպարտամենտի բարձրաստիճան ներկայացուցիչը:

«Անկասկած լուսանկարներն իրական են, սակայն որոշ դեպքերում նոր չեն…Անկասկած, դրանք նավթ փոխադրող բեռնատարներ են նավթի հավաքման կետերի առջև, այդ պատճառով էլ մենք գրոհում ենք դրանք»,-ասել է Պետդեպի ներկայացուցիչը, հայտնում է ՌԻԱ Նովոստին:

«Ես դեռ չեմ տեսել սահմանային անացկետերի լուսանկարներ բենզակիրների անցման պահին, չեմ կարծում, որ նման լուսանկարներ գոյություն ունեն»,-հավելել է նա:

Ավելի վաղ Ռուսաստանի պաշտպանության նախարարությունը հայտարարել էր, որ Թուրքիայի նախագահ Ռեջեփ Թայիփ Էրդողանն ու նրա ընտանիքը առնչություն ունեն «Իսլամական պետությունից» նավթ գնելու գործարքներին: «ԻՊ գողացած նավթի հիմնական սպառողը Թուրքիան է: Այդ հանցավոր բիզնեսի մեջ ներգրավված է երկրի գերագույն ղեկավարությունը` նախագահ Էրդողանն ու նրա ընտանիքը»,-ասել է ՌԴ պաշտպանության փոխնախարար Անատոլի Անտոնովը:

Անտոնովը ուշադրությունը հրավիրել էր այն փաստին, որ Էրդողանի որդին խոշորագույն էներգետիկ ընկերության ղեկավարն է, իսկ փեսան` էներգետիկայի նախարարը:

Որպես ապացույց ՊՆ-ն ներկայացրել է արբանյակային լուսանկարներ, որտեղ տեսանելի են բենզակիրների և ֆուրերի կուտակումներ, ինչպես նաև բենզակիրների շարասյան կողմից թուրք-սիրիական սահմանը հատելու տեսագրություն: Սակայն Իրաքյան Քրդստանի նավթագազային հանձնաժողովի ղեկավար Շերկո Ջեվդեթը հայտարարեց, թե պատկերված բենզակիրները տեղափոխում են քրդական նավթը Թուրքիայի Ջեյհան նավահանգիստ և կապ չունեն ԻՊ հետ:

Հղումներ թեմայով.

РИА: Госдеп заявил, что показанные РФ грузовики с нефтью шли не в Турцию