Ոսկերիչների ՍԻԲՋՕ-ի համաժողովը՝ Երևանում. 25 երկրից ավելի քան 80 պատվիրակ է մասնակցում

26 հոկտեմբերի 2016 - 13:29 AMT

PanARMENIAN.Net - Հոկտեմբերի 26-ին մայրաքաղաքի «Մերիդիան» ցուցահանդեսային կենտրոնում բացվել է ոսկերիչների համաշխարհային համադաշնության՝ ՍԻԲՋՕ-ի համաժողովին: Բացմանը ներկա է գտնվել ՀՀ նախագահ Սերժ Սարգսյանը:

25 երկրից ժամանած ոսկերչության և թանկարժեք մետաղների մշակման ոլորտները ներկայացնող ավելի քան 80 պատվիրակի հետ միասին համաժողովին մասնակցել է նաև ՍԻԲՋՕ-ի նախագահ Գայետանո Կավալիերին: Հանրապետության նախագահը ողջունել է համաժողովի մասնակիցներին:

«Հայաստանն ու սփյուռքը մեծ ավանդ են ներդրել ոսկերչության և ակնագործության զարգացման գործում, իրենց հաստատուն տեղն ունեն այս ոլորտի տարեգրության մեջ: Հայ ոսկերիչների հաջողությամբ ստեղծված գործերը, նրանց գործունեությունը տարբեր երկրներում ոլորտին բերել են զարգացում, նրանք հիմնել են ոսկերչական ձեռնարկություններ ու վաճառատներ Նյու Յորքում ու Փարիզում, Մոսկվայում և Լոնդոնում, Կոստանդնուպոլսում ու Բեյրութում, Կահիրեում և բազմաթիվ այլ վայրերում:

Այսօր Հայաստանում ոսկեգործության և ադամանդագործության զարգացման ուղղությամբ հետևողական աշխատանքներ են տարվում: Մենք այդ ճյուղը հայտարարել ենք երկրի տնտեսության գերակա, ռազմավարական ուղղություններից մեկը», - մասնավորապես ասել է նախագահը:

Նրա խոսքով, արտադրական համալիր լինելուց բացի «Մերիդիանը» հսկայական ցուցահանդեսային կենտրոն է, որն արդեն 6-րդ անգամ ընդունում է «Երևան շոու» ոսկերչական միջազգային ցուցահանդեսը: Վերջինս անց է կացվում Հայաստանի նախագահի հովանու ներքո:

Ելույթի ավարտին Սարգսյանը Համաշխարհային ոսկերչական համադաշնության նախագահ Գայետանո Կավալիերիին պարգևատրել է Երախտագիտության մեդալով՝ Հայաստանում Համաշխարհային ոսկերչական համադաշնության ծավալած գործունեության, ինչպես նաև հայ ոսկերչական ու ոսկեգործական ավանդույթներն աշխարհում արժանվույնս ներկայացնելու համար:

Ավելի ուշ, Սարգսյանը «Մերիդիան» ցուցահանդեսային կենտրոնում հանդիպում է ունեցել Քիմբերլիի գործընթացի նախագահ, Արաբական Միացյալ Էմիրությունների ներկայացուցիչ Ահմեդ Բին Սուլայեմի հետ:

Նախագահը հույս հայտնել, որ Ահմեդ Բին Սուլայեմի այցը Հայաստան կնշանավորվի ինչպես Քիմբերլիի գործընթացի շրջանակներում համագործակցության ամրապնդման, այնպես էլ, հաշվի առնելով նրա հարուստ փորձը ԱՄԷ-ում ադամանդագործության և ոսկեգործության ոլորտում, երկկողմ փոխշահավետ գործարար ծրագրերի նախանշման և իրականացման հարցում: Նախագահի համոզմամբ, այս առումով Ոսկերիչների համաշխարհային համադաշնության համաժողովի անցկացումը Երևանում լավ հնարավորություններ է ստեղծում:

Սարգսյանը կարևորել է Քիմբերլիի գործընթացը՝ որպես աշխարհում, այսպես կոչված, «կոնֆլիկտային» կամ «արյունոտ» ալմաստների շրջանառությունը բացառելու նպատակով միջազգային ջանքերի համախմբման ու մասնակից երկրների կողմից հանձնառության վառ օրինակ, ընդգծելով, որ գործընթացի կարևորությունը մեծանում է հատկապես մեր օրերում, երբ աշխարհում ավելացել են հակամարտություններն ու լարվածության նոր օջախները: ՀՀ Նախագահը ցավալի է համարել, որ բնական պաշարները մարդիկ օգտագործում են ոչ թե ի շահ, այլ ի վնաս:

Նախագահն ընդգծել է, որ Հայաստանը 2003-ից միանալով Քիմբերլիի գործընթացին, որը մեր երկրին հնարավորություն է ընձեռել լինել ալմաստների համաշխարհային շուկայի լիիրավ մասնակից, հետևողական է գործընթացի շրջանակներում հանձնառությունների իրականացման հարցում:

Քիմբերլիի գործընթացի նախագահը նշել է, որ Հայաստան է ժամանել նաև որպես Դուբայի առևտրային համայնքի ներկայացուցիչ և ցանկություն ունի Հայաստանի կառավարության հետ քննարկելու ինչպես Քիմբերլիի գործընթացի, այնպես էլ հայ-էմիրաթական առևտրատնտեսական կապերի ամրապնդմանն ուղղված հարցեր:

Քիմբերլի գործընթացը (Kimberley Process) միջազգային կազմակերպություն է, որ ստեղծվել է` կասեցնելու կոնֆլիկտային ադամանդների հոսքը, հատկապես` ալմաստի հումքի, որն ապստամբական շարժումներն օգտագործում են` ֆինանսավորելու իրենց ռազմական գործողությունները, այդ թվում` օրինական կառավարություններին տապալելու նպատակով:

Քիմբերլի գործընթացը սկսվել է Հարավային Աֆրիկայում ադամանդ արդյունահանող պետությունների ներկայացուցիչների` 2000թ. մայիսին Քիմբերլիում (Հարավաֆրիկյան Հանրապետություն) առաջին համաժողովի անցկացմամբ, որի նպատակը կոնֆլիկտային ադամանդների առևտրի դադարեցման և ադամանդի գնումները ապստամբական շարժումների ֆինանսավորմանը չծառայեցնելու ուղիների շուրջ քննարկումն էր:

2000թ. դեկտեմբերին ՄԱԿ-ի գլխավոր ասամբլեան ընդունել է չմշակված ադամանդի հավաստագրման միջազգային համակարգի ստեղծումն աջակցող պատմական բանաձև: 2002թ. նոյեմբերին կառավարությունների, ադամանդի միջազգային արդյունաբերության և քաղաքացիական հասարակության կազմակերպությունների միջև բանակցությունների արդյունքում ձևավորվել է Քիմբերլի գործընթացի հավաստագրման համակարգը (Kimberley Process Certification Scheme- KPCS): KPCS փաստաթուղթը սահմանում է ալմաստի արդյունահանման և վաճառքի վերահսկողության պահանջները: KPCS-ն ուժի մեջ է մտել 2003թ., երբ մասնակից երկրները սկսել են իրականացնել սահմանված կանոնները:

Ելնելով Հայաստանի Հանրապետությունում ադամանդագործության ոլորտի հետագա կայուն զարգացման անհրաժեշտությունից, ՀՀ կառավարության 2002թ. դեկտեմբերի 19-ի` «Քիմբերլի գործընթացին ՀՀ կառավարության միանալու մասին» թիվ 2081-Ն որոշմամբ Հայաստանը միացել է Քիմբերլի գործընթացին։ 2003 թվականի հունվարի 1-ից Հայաստանում ալմաստի հումքի առուվաճառքն իրականացվում է միայն Քիմբերլի գործընթացի անդամ երկրների հետ և ալմաստի հումքի ցանկացած բեռ, անկախ այն բանից` ներմուծվում է, թե արտահանվում, պետք է ուղեկցվի արտահանող երկրի տրամադրած Քիմբերլի հավաստագրով:

Ուշագրավ

Ըստ ԿԲ-ի՝ Արցախի կուտակային կենսաթոշակային համակարգի գումարներն ապահով ակտիվներում են

Ըստ ֆինանսների նախարարության՝ միջպետական վարկի մնացորդն ուղղվելու է բռնի տեղահանված անձանց աջակցությանը

Խաղողի 65,000 տ ավելցուկ կա. Մթերող ընկերությունները կսուբսիդավորվեն

Կապահովվի խաղողի մթերումների գործընթացի կազմակերպումը

ԵԱԶԲ–ն չի բացառել՝ ՀՀ տնտեսական աճը տարեվերջին կարող է գերազանցել 7․5%-ը

Բանկի զեկույցում նշվում է, որ Հայաստանի տնտեսական ակտիվությունն ավելացել է 10․4 տոկոսով հունվար–օգոստոսին

ԿԲ. Տեղահանված արցախցիների վարկերի մասով անհատական կամ ընդհանուր լուծումներ կառաջարկվեն

Տարհանված քաղաքացիների ֆինանսական սպասարկման հետ կապված կարող են խնդիրներ առաջանալ հիմնականում գրավադրված գույքի (ոսկով գրավադրված վարկերի) ֆիզիկական առկայության մասով