Դավիթ Հակոբյանը ՀՀ ԶՈւ 25-ամյակին նվիրված ֆոտոցուցահանդես է բացել Մոսկվայում

 27 հունվարի 2017 - 17:59 AMT

PanARMENIAN.Net - ՀՀ Զինված ուժերի 25-րդ տարեդարձին ընդառաջ՝ հունվարի 26-ին Մոսկվայի եկեղեցական համալիրի ներքո գործող «Տապան» թանգարանում բացվել է ՀՀ նախագահի անձնական լուսանկարիչ Դավիթ Հակոբյանի անհատական ցուցահանդեսը:

Ցուցահանդեսը կազմակերպվել է ՌԴ-ում ՀՀ դեսպանության և Ռուսաստանի ու Նոր Նախիջևանի Հայոց թեմի աջակցությամբ:

Միջոցառմանը բացման խոսքով հանդես են եկել ՌԴ-ում ՀՀ դեսպան Օլեգ Եսայանը, Ռուսաստանի և Նոր Նախիջևանի Հայոց թեմի առաջնորդ Եզրաս արքեպիսկոպոս Ներսիսյանը:

ՌԴ-ում ՀՀ դեսպանն ընդգծել է Մոսկվայում Հայոց բանակի կազմավորման 25-ամյակին նվիրված ցուցահանդեսի կազմակերպման կարևորությունն, ինչպես նաև շնորհավորել է երիտասարդ լուսանկարչին ցուցահանդեսի բացման առթիվ:

Ներկաներին ուղղված խոսքով հանդես է եկել նաև ներկայացված աշխատանքների հեղինակ Դավիթ Հակոբյանը:

Հակոբյանի՝ ՀՀ ԶՈՒ-ի կազմավորման 25-ամյակին նվիրված անհատական ցուցահանդեսին ներկայացված է Հայաստանում և Արցախում վերջին տարիներին արված քսան լուսանկար: Ցուցահանդեսը կտևի մինչև փետրվարի 23-ը:

Դավիթ Հակոբյանը լուսանկարչությամբ է զբաղվում 2002-ից: 2007-ից աշխատել է «Արմենպրես» լրատվական գործակալությունում որպես ֆոտոլրագրող: 2010-ից ՀՀ նախագահի անձնական լուսանկարիչն է: Ստեղծման օրվանից PAN Photo-ի թիմի անդամ է: