ՀՀ-ում տուբերկուլոզի հաղթահարման հայեցակարգ է մշակվել

PanARMENIAN.Net - ՀՀ-ում տուբերկուլոզի հաղթահարման նպատակով հակատուբերկուլոզային ծառայությունների նոր` արդյունավետ մոդելի հայեցակարգի նախագիծը քննարկվել է ՀՀ առողջապահության նախարար Լևոն Ալթունյանի մոտ։

Ներկայացնելով նախագիծը` Գլոբալ հիմնադրամի ծրագրերը համակարգող խմբի ղեկավար Հասմիկ Հարությունյանն ընդգծել, որ մինչև այժմ իրականացված ծրագրերի արդյունքում Հայաստանում վերջին 10 տարում զգալի բարելավվել են տուբերկուլոզի համաճարակաբանական ցուցանիշները, մասնավորապես` տարեկան հայտնաբերվող նոր դեպքերի թիվը կրճատվել է 2, իսկ մահացությունը` 3 անգամ։

Հայեցակարգում նախագծված քայլերը տուբերկուլոզը ՄԱԿ-ի կայուն զարգացման երրորդ նպատակին համահունչ հաղթահարելու նպատակ են հետապնդում։ Հիմնական ուղղվածությունը աշխատանքների արդյունավետության բարձրացումն է։

Քննարկման արդյունքում հայեցակարգն արժանացել է հավանության։

Լևոն Ալթունյանն առաջարկել է մշակել կոնկրետ գործողությունների ծրագրեր` վարակի վերահսկման իրավական դաշտի վերանայման, ծառայությունների վերակազմակերպման և ֆինանսավորման մեխանիզմների բարելավման, արտահիվանդանոցային ծառայությունների ամրապնդման և կադրային ներուժի զարգացման նպատակով, հայտնում է առողջապահության նախարարության մամուլի ծառայությունը: