Կարեն Ավագյանի դիմումով քրգործ է հարուցվել ՀԵՀ տնօրենի հանդեպ

PanARMENIAN.Net - 2018 թվականի մայիսի 25-ին Հայաստանի երիտասարդական հիմնադրամի (ՀԵՀ) հոգաբարձուների խորհրդի անդամ, ԱԺ ՀՀԿ-ական պատգամավոր Կարեն Ավագյանը դիմում է ներկայացրել ՀՀ քննչական կոմիտե, որում մեղադրել է ՀԵՀ-ի գործադիր տնօրենին ապրիլի 6-ին հիմնադրամի անունից ինքն իր հետ 326 մլն դրամի փոխառության պայմանագիր կնքելու մեջ: Այս մասին հայտնում է ՀՀ քննչական կոմիտեի մամուլի ծառայությունը:

Դիմումի հիման վրա՝ ՀՀ քննչական կոմիտեի Երևան քաղաքի քննչական վարչությունում նախապատրաստվել են նյութեր, հարուցվել է քրեական գործ՝ առանձնապես խոշոր չափերով յուրացում կատարելու դեպքի առթիվ՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով։

Իրականացվում են քննչական և դատավարական այլ միջոցառումներ՝ դեպքի բոլոր հանգամանքների բազմակողմանի քննությունն ապահովելու, ենթադրյալ հանցագործություն կատարած անձանց շրջանակը պարզելու և համապատասխան քրեաիրավական գնահատական տալու ուղղությամբ:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: