Պուտինը կոչ է արել մտածել ՆԱՏՕ-ին Վրաստանի և Ուկրաինայի անդամակցության հետևանքների մասին

19 հուլիսի 2018 - 15:51 AMT

PanARMENIAN.Net - Ռուսաստանը համարժեք է արձագանքելու ՆԱՏՕ-ի ագրեսիվ քայլերին՝ նրանք, ովքեր ձգտում են, որ Ուկրաինան և Վրաստանը անդամակցեն դաշինքին, պետք է մտածեն նման անպատասխանատու քաղաքականության հետևանքների մասին: Այդ մասին հայտարարել է ՌԴ նախագահ Վլադիմիր Պուտինը:

«Նման ագրեսիվ քայլերին, որոնք անմիջական սպառնալիք են ստեղծում ՌԴ համար, մենք համարժեք ենք արձագանքելու: Մեր գործընկերները, որոնք սրման են գնում, ձգտում են, օրինակ, որ Վրաստանն ու Ուկրաինան ներառվեն դաշինքի ռազմական ուղեծրում, պետք է մտածեն նման անպատասխանատու քաղաքականության հնարավոր հետևանքների մասին»,-ասել է Պուտինը ՌԴ դեսպանների և մշտական ներկայացուցիչների հետ խորհրդակցության ժամանակ, հայտնում է ՌԻԱ Նովոստին:

Պուտինը նշել է, որ Եվրոպայում անվտանգության հիմքը համագործակցությունն ու վստահությունն են: «Եվրոպայում անվտանգության և կայունության ապահովման բանալին գործակցությունն ընդլայնելն ու վստահությունը վերականգնելն է, ոչ թե ՌԴ սահմանների մոտ ՆԱՏՕ-ի նոր ռազմակայաններ և ռազմական ենթակառուցվածքներ ստեղծելը, ինչը տեղի է ունենում»,-ասել է Պուտինը:

ՆԱՏՕ-ի գլխավոր քարտուղար Յենս Ստոլտենբերգն ավելի վաղ հայտարարել էր, որ Վրաստանն ապագայում դաշինքի անդամ կդառնա, դա հաստատվել է գագաթնաժողովում և կազմակերպությունը կշարունակի նախապատրաստել այդ գործընթացը: Իսկ Բրյուսելում ընդունված հայտարարությունում ՆԱՏՕ-ն հաստատել է, որ Ուկրաինան դառնալու է ՆԱՏՕ-ի անդամ:

Հղումներ թեմայով.

Ria.ru. Путин призвал задуматься о последствиях вхождения Грузии и Украины в НАТО