Սելին Դիոն․ Հայ ժողորվդի զավակ Ազնավուրը ֆրանսերեն սիրերգի ամենահայտնի դեսպանն էր

PanARMENIAN.Net - Կանադացի աշխահահռչակ երգչուհի Սելին Դիոնը ֆեյսբուքյան իր էջում ցավակցական խոսքեր է գրել ֆրանսահայ շանսոնյե Շառլ Ազնավուրի մահվան կապակցությամբ:

«Այսօր մենք հրաժեշտ ենք տալիս պարոն Շառլին, ով լինելով հայ ժողովրդի որդին, դարձել էր ֆրանսերեն սիրային երգերի ամենահայտնի «դեսպանը»: Որպես մեծ Արտիստ՝ բեմը նրա տունն էր մինչև վերջին պահը: Նրա ռոմանտիկ բալլադները դարձել էին բազմաթիվ սերունդների անբաժան մասը, և ամբողջ աշխարհը հիմա սգում է», - գրել է երգչուհին:

Երեկ՝ հոկտեմբերի 1-ին, 94-ամյա շանսոնյեն մահացել է:

Շառլ Ազնավուրը (իսկական անունը՝ Շահնուր Վաղինակ Ազնավուրեան) ծնվել է 1924 մայիսի 22-ին Փարիզում` հայ գաղթականներ Միշա և Քնար Ազնավուրյանների ընտանիքում: Նա ֆրանսահայ նշանավոր երգիչ, երգահան, գրող, կինոդերասան և հասարակական գործիչ է։ 1988-ի սպիտակյան ավերիչ երկրաշարժից անմիջապես հետո հիմնադրել է «Ազնավուրը՝ Հայաստանին» բարեգործական հիմնադրամը։ 2009 թվականի մայիսից Շվեյցարիայում Հայաստանի դեսպանն է, Հայաստանի մշտական դեսպանն է ՅՈւՆԵՍԿՕ-ում:

Ազնավուրը մոտ 1000 երգի հեղինակ է (մի մասը՝ երգահան Ժորժ Կառվարենցի հեղինակցությամբ), այդ թվում՝ բազմաթիվ միջազգային հիթերի՝ «Մաման», «Բոհեմը», «Դեռ երեկ», «Երիտասարդություն», «Պետք է գիտնալ», «Նա», «Երկու կիթառ», «Ինչպես ասում են», «Հավերժական սեր», «Ավե Մարիա» և այլն։ Ցայսօր վաճառվել է Ազնավուրի մոտ 100 միլիոն ձայնապնակ։ Ամերիկյան «Թայմ» հանդեսի հարցման համաձայն Ազնավուրը ճանաչվել է «Դարի արվեստագետ»։ Արժանացել է Հայաստանի և Ֆրանսիայի բարձրագույն պետական պարգևներին, «Պատվո սեզարի» (1997)։