ՀՀ նախագահը՝ Գլենդեյլի քաղաքապետին. Հայաստանը նաև սփյուռքի մեր հայրենակիցների տունն է

3 հուլիսի 2019 - 15:23 AMT

PanARMENIAN.Net - Հայաստանը նաև սփյուռքի հայրենակիցների տունն է: Այդ մասին հայտարարել է Հանրապետության նախագահ Արմեն Սարգսյանը՝ հյուրընկալելով ԱՄՆ Կալիֆորնիա նահանգի Գլենդեյլի քաղաքապետ Արա Նաջարյանին:

Նախագահ Սարգսյանը ողջունել է Գլենդեյլի հայազգի քաղաքապետի այցը հայրենիք: Հայրենիք-Սփյուռք կապերն ամրապնդելու համատեքստում նախագահն Արա Նաջարյանին առաջարկել է խորացնել քույր քաղաքների՝ Գյումրիի ու Կապանի հետ համագործակցությունը: Արմեն Սարգսյանը մասնավորապես ներկայացրել է Գյումրիի հետ կապված իր ծրագրերը՝ առաջարկելով Գլենդեյլին նվիրված միջոցառում կազմակերպել Գյումրիում և Գյումրիին նվիրված միջոցառում՝ Գլենդեյլում: Նա պատրաստակամություն է հայտնել նախագահական նստավայրում կազմակերպել միջոցառում՝ նվիրված Գլենդեյլի մշակութային ժառանգությանն ու բազմազանությանը:

Արա Նաջարյանը նշել է, որ հաճախակի է լինում Հայաստանում, և ամեն անգամ այդ այցելություններն իրեն ուժ են տալիս: Նա պատրաստակամությամբ է ընդունել նախագահի առաջարկությունները՝ նշելով, որ իր հնարավորություններով կձգտի նպաստել դրանց իրագործմանը, հայտնում է նախագահի մամուլի ծառայությունը: