Ազգային անվտանգության ծառայությունից չեն հայտնում՝ կան արդյոք Պաշտպանության նախարարաությունում բանակից $1 մլն հափշտակելու մեջ մեղադրվող Դավիթ Գալստյանի՝ Պատրոն Դավոյի գործով բերման ենթարկվածներ կամ ձերբակալվածներ։

PanARMNEIAN.Net-ին ԱԱԾ տեղեկատվության և հասարակայնության հետ կապերի բաժնից ասացին, որ գործի մասին այլ մանրամասներ չեն կարող հայտնել, քան ներկայացված է ավելի վաղ տարածված հաղորդագրությունում։

Պաշտպանության նախարարությունից նույն հարցով մեկնաբանություն ստանալ առայժմ չի ստացվում։

Գալստյանը բերման էր ենթարկվել փետրվարի 1-ին՝ բանակին 1980-ականների արկերի փոխարեն 70-ականների արկեր վաճառելու և 523 մլն դրամին համարժեք՝ $1 մլն խարդախությամբ հափշտակելու համար։ Միջնորդություն է ներկայացվել դատարան՝ կալանավորումը որպես խափանման միջոց կիրառելու վերաբերյալ։ Ինքը՝ Գալստյանը հայտարարել էր, որ նախաքննական մարմինը չի ցուցաբերել բավարար պրոֆեսիոնալիզմ և գործում առկա տվյալների վերլուծությամբ չի տվել ճիշտ գնահատական կամ փորձել է իրականությունը խեղաթյուրելով ստեղծել պատրանք, որ զինված ուժերին խարդախության միջոցով մատակարարվել է 70-ական թվականների արտադրության զինամթերք։