Վերջին շրջանում ՀՀ-ում Covid-19-ի դեպքերի աճով պայմանավորված, Զինված ուժերում արձակուրդների սահմանափակումներ են սահմանվել։

Զինված ուժերում իրականացվում են սանիտարահիգիենիկ և հակահամաճարակային միջոցառումներ, տեղեկացնում է Պաշտպանության նախարարությունը։

Ղեկավարվելով ՀՀ կառավարության 2020-ի սեպտեմբերի 11-ի 1514-Ն որոշման 17-րդ կետի պահանջներով՝ արգելվել են ժամկետային պարտադիր զինծառայողների տեսակցությունները, արձակումները և արձակուրդները։

Բացառություն են կազմում «Զինվորական ծառայության և զինծառայողի կարգավիճակի մասին» ՀՀ օրենքի 28-րդ հոդվածի 6-րդ մասի 2-րդ ենթակետի հիմքով նախատեսված (ընտանիքի անդամի՝ կին, երեխա, հայր, մայր, քույր, եղբայր, տատ, պապ) մահվան դեպքերը:

Հայաստանում մարտի 17-ի դրությամբ կորոնավիրուսով վարակի դեպքերը հասել են 180,141-ի։ Փաստացի բուժվողների թիվը գերազանցել է 9000-ը։