ԱՆ․ Ապրիլի 13-ից սկսվում են Covid-19-ի դեմ լայնածավալ պատվաստումները

PanARMENIAN.Net - Հայաստանում ապրիլի 13-ից սկսվում է կորոնավիրուսի դեմ լայնածավալ պատվաստումների գործընթացը, փոխանցում են Առողջապահության նախարարությունից։

«Պատվաստման համար առանձնացվել են ռիսկի խմբեր, դրանք են` 65 և բարձր տարիքի անձինք, 18-64 տարեկան քրոնիկ հիվանդները, տարեցների խնամքի կենտրոնների բնակիչներն ու աշխատակիցները, սոցիալական խնամքի կենտրոնների աշխատակիցները»,- հայտնում են նախարարությունից։

ԱՆ-ից նշում են նաև, որ Հայաստան է ներկրվել 24,000 դեղաչափ AstraZeneca և 15,000 դեղաչափ՝ 7500 անձի համար «Սպուտնիկ V» պատվաստանյութերը: Պատվաստումներն իրականացվում են կամավորության սկզբունքով` ռիսկի խմբերի շրջանում:

Ռիսկի խմբերում ընդգրկված 55-ից ցածր տարիքի անձինք կպատվաստվեն «Սպուտնիկ V»-ով, իսկ 55-ից բարձր տարիք ունեցողները՝ AstraZeneca-ով: Նախկինում ձեռք բերված 2000 դեղաչափ «Սպուտնիկ V» պատվաստանյութով պատվաստվել են վարակվածներին սպասարկող բժշկական կենտրոնների բուժանձնակազմեր։