Ռուս խաղաղապահների հրամանատարի պաշտոնում Կոսոբոկովին կփոխարինի գեներալ-լեյտենանտ Անաշկինը

PanARMENIAN.Net - ՌԴ խաղաղապահ ուժերի հրամանատարի պաշտոնում գեներալ-մայոր Միխայիլ Կոսոբոկովին կփոխարինի գեներալ-լեյտենանտ Գենադի Անաշկինը: Սեպտեմբերի 25-ին ՀՀ պաշտպանության նախարար Արշակ Կարապետյանն ընդունել է գեներալ-լեյտենանտ Ռուստամ Մուրադովին, Անաշկինին և Կոսոբոկովին:

Արցախում տեղակայված ռուս խաղաղապահների նախկին հրամանատար Կոսոբոկովը, որն այդ պաշտոնում փոխարինել էր Մուրադովին, պաշտոնավարել է ընդամենը մոտ 2 շաբաթ։

Հանդիպմանը Ռուսաստանի հարավային ռազմական օկրուգի հրամանատարի տեղակալ Ռուստամ Մուրադովը ներկայացրել է Արցախում Ռուսաստանի Դաշնության խաղաղապահ ուժերի նորանշանակ հրամանատար, ՌԴ հերոս Անաշկինին:

ՀՀ պաշտպանության նախարարը շնորհավորել է վերջինիս նոր պաշտոնն ստանձնելու կապակցությամբ և հաջողություն մաղթել խաղաղապահ առաքելության իրականացման ընթացքում:

ՊՆ ղեկավարը շնորհակալություն է հայտնել Կոսոբոկովին՝ պաշտոնավարման ընթացքում պատշաճ ծառայության համար և հաջողություն մաղթել հետագա գործունեության մեջ:

Կողմերը բարձր են գնահատել Ռուսաստանի Դաշնության ջանքերը՝ ուղղված տարածաշրջանում ռազմաքաղաքական իրավիճակի կայունացմանը և գոհունակություն հայտնել Արցախում իրականացվող ՌԴ խաղաղապահ առաքելության արդյունավետության կապակցությամբ:

Կարծիքներ են փոխանակվել նաև տարածաշրջանային անվտանգության խնդիրների շուրջ:

Գեներալ-լեյտենանտ Գենադի Անաշկինը ծառայել է Հարավսլավիայում, մասնակցել Չեչնիայի պատերազմներին, Անաշկինի հրամանատարության տակ գտնվող խումբը 2008-ին մասնակցել է Հարավային Օսիայի մարտական գործողություններին։