ՊՆ փոխնախարար Արման Սարգսյանը լրագրողների հետ ճեպազրույցում ասել է, որ մարտական հրաձգության դասընթացներին կանանց ցուցաբերած ակտիվությունը ծնել է գաղափար, որ նրանց ևս կարելի է ներգրավել զինվորական ծառայության մեջ, բայց ոչ թե պարտադրաբար, այլ՝ կամավորության սկզբունքով։
«Ներկայումս քննարկման փուլում է օրենքի նախագիծը, և երբ արդեն պատրաստ լինի, կդրվի շրջանառության մեջ։ Հիմա միայն կարող եմ ասել, որ կամավորության սկզբունքով է իրականացվելու»,- ասել է փոխնախարարը և հավելել, որ պարտադիր զինծառայոթւյան մասին օրենքի հետ հակասություններ չլինելու համար աշխատում են նախագծի վրա, գրում է «Փաստինֆոն»։
Դիտարկմանը, թե կանայք ցանկության դեպքում հիմա էլ կարող են ԶՈւ շարքերում ծառայության անցնել պայմանագրային հիմունքներով, ո՞րն է նոր նախագիծ բերելու նպատակը, փոխնախարարը պատասխանել է. «Խնդիրն այն կանանց ներուժն օգտագործելն է, ովքեր ցանկություն ու հնարավորություն ունեն իրենց ներդրումն ունենալու ԶՈւ մարտունակության բարձրացման գործում»։
Վարչապետ Նիկոլ Փաշինյանը հունվարի 10-ի ասուլիսում ասել էր, որ այն հայտարարությունները, թե Ադրբեջանն ուզում է վերացնել հայկական պետությունը, չեն կարող մերկապարանոց համարվել։ Նա հավելել էր, որ նույնիսկ Ադրբեջանի հետ խաղաղության պայմանագրի հիպոթետիկ ստորագրման դեպքում երաշխիք չկա, որ մի քանի օրից նոր ռազմական գործողություններ չեն սկսվի։