Էրդողանի կուսակցությունը պարտվել է ՏԻՄ ընտրություններում․ Հաղթել են ընդդիմադիր քեմալները

PanARMENIAN.Net - Թուրքիայի նախագահ Ռեջեփ Թայիփ Էրդողանի «Արդարության և զարգացման» կուսակցությունը վերջին 20 տարում առաջին անգամ պարտվել է ընդդիմությանը մարտի 31–ին տեղի ունեցած ՏԻՄ ընտրություններում։ Քվեների 90 տոկոսի հաշվարկից հետո նախնական տվյալներով, քեմալական Ժողովրդա–հանրապետական կուսակցությունը խոշոր քաղաքներում ստացել է ձայների մոտ 37.35%-ը, իշխող ԱԶԿ-ն՝ 35.75%-ը, հայտնում է ՏԱՍՍ–ը։

Թուրքիայի նախագահ Ռեջեփ Թայիփ Էրդողանը խոստովանել է, որ իր գլխավորած իշխող «Արդարություն և զարգացում» կուսակցությունը չի կարողացել ցանկալի արդյունքի հասնել։

«2023 թվականի մայիսին ընտրություններում մեր հաղթանակից ինն ամիս անց, ցավոք, մենք չկարողացանք հասնել այն արդյունքին, որը ցանկանում էինք»,-ասել է Էրդողանը։

Նա հավելել է, որ ինքը և իր կուսակցությունը չեն անտեսի ժողովրդի կամքի դրսևորման արդյունքները։

ԺՀԿ-ն վստահ հաղթանակ է տարել Ստամբուլում, Անկարայում և Իզմիրում, հայտնում է Ermenihaber-ը։

Ստամբուլի քաղաքապետի թեկնածու Էքրեմ Իմամօղլուն ստացել է ձայների 51.9%–ը, Անկարայի քաղաքապետի թեկնածու Մանսուր Յավաշ - 60.35%–ը, Իզմիրի քաղաքապետի թեկնածու Ջեմիլ Թուգայ - 48.90%։

ԱԶԿ-ին և ԺՀԿ-ինձայների 6.19 տոկոսովհաջորդում է «Նոր բարօրություն» կուսակցությունը: